Қазақстанда шариғат талаптарына сай халал бөліп төлеу жүйесін іске қосу жоспарланып отыр. Бұл туралы Zaman Bank басқарма төрағасының орынбасары Диар Смағұлов Forbes басылымына берген сұхбатында мәлімдеді.

Оның айтуынша, банк жеке маркетплейс құруды мақсат етпейді. Себебі мұндай жоба ұзақ уақыт пен қомақты қаржыны талап етеді. Осыған байланысты Zaman Bank қолданыстағы маркетплейстермен әріптестік орнатып, сол платформалар арқылы халал бөліп төлеу қызметін ұсынуды көздеп отыр.

«Маркетплейс қалыптастыру - күрделі үрдіс. Мысалы, Kaspi-дің бұл бағыттағы жолы шамамен 10 жылға созылды. Біз дайын инфрақұрылымы бар платформалармен бірлесіп жұмыс істегенді жөн көрдік. Егер бастама өзін ақтаса, алдағы уақытта Amazon секілді халықаралық алаңдарға шығу мүмкіндігі де қарастырылады»,- деді Диар Смағұлов.

Сондай-ақ ол 2026 жылы күшіне енетін «Банктер және банк қызметі туралы» жаңартылған заңға тоқталды. Құжатқа енгізілген өзгерістерге сәйкес, екінші деңгейлі банктерге исламдық терезелер ашуға рұқсат беріледі. Бұл бөлімшелер өсімсіз, ислам қаржы қағидаттарына негізделген қызмет көрсетеді. Бұған дейін елде мұндай өнімдерді ұсыну үшін жеке ислам банкін құру қажет болатын.

Диар Смағұлов Zaman Bank-тің әзірге жеке төлем картасы жоқ екенін де атап өтті. Дегенмен банк жақын арада Mastercard халықаралық төлем жүйесінің клубына қосылған.

Айта кету керек, халал бөліп төлеу тетігінде банк немесе сауда орны тауарды алдымен өзі сатып алып, кейін тұтынушыға белгіленген құнмен бөліп төлеу арқылы ұсынады. Бұл жүйенің дәстүрлі несие мен бөліп төлеуден басты ерекшелігі - пайыздық өсімнің болмауы және исламда тыйым салынған қаржылық элементтердің қолданылмауы.