Қазақстанда мал шаруашылығында еңбек ететін азаматтарға арналған әлеуметтік қолдау шараларын кеңейту жоспарланып отыр. Атап айтқанда, малшылар мен шопандардың зейнетке шығу жасын төмендету мәселесі қарастырылуда.

Бұл бастама 2026–2030 жылдарға арналған мал шаруашылығын дамыту жөніндегі кешенді жоспардың бір бөлігі ретінде ұсынылған. Құжатта ауыл еңбеккерлерінің тұрмыс сапасын арттыруға бағытталған бірқатар қосымша жеңілдіктер де қамтылған.

Жоспарға сәйкес, мал шаруашылығымен айналысатын азаматтарға 5–6 пайыздық мөлшерлемемен жеңілдетілген несие беру, мерзімді әскери қызметке шақыруды кейінге қалдыру тетігі енгізілуі мүмкін. Сонымен қатар, малшылардың балаларына білім беру гранттарын тағайындауда басымдық беру және ауылдық жерлерде тұрғын үй салуға мемлекеттік қолдау көрсету көзделіп отыр.

Аталған ұсыныстар Қоғамдық кеңестің отырысында талқыланып, қатысушылар тарапынан толық қолдау тапқан. Енді бастамалар тиісті мемлекеттік органдардың қарауына жолданады.