Қаржы министрі Мәди Такиев мемлекеттік қызметшілердің табыс пен мүлікке қатысты декларацияларының не себепті әлі жарияланбай отырғанын түсіндірді. Бұл туралы ол Үкімет отырысынан кейін өткен брифингте айтты.
Министрдің сөзінше, қолданыстағы сыбайлас жемқорлыққа қарсы талаптарға сәйкес декларациялар 31 желтоқсанға дейін ашық түрде жариялануы тиіс.
– Заңда көрсетілген мерзім сақталады. Декларациялар жыл соңына дейін жарияланады, – деді Мәди Такиев журналистердің сұрағына жауап бере отырып.
Сонымен қатар ол қазіргі декларациялау форматының ерекшеліктеріне тоқталды. Айтуынша, құжатта барлық қаржылық көрсеткіштер емес, тек белгілі бір деректер ғана қамтылады.
– Декларацияда есепті кезеңде сатып алынған немесе сатылған мүлік, шетелдегі активтер, банк шоттары мен үлестік қатысу туралы ақпарат көрсетіледі. Егер жыл ішінде мұндай операциялар болмаған жағдайда, декларация бос күйінде беріледі, – деп нақтылады министр.
Осылайша, шенеуніктер декларациясын формалды түрде тапсырғанымен, онда көрсетілетін мәліметтердің шектеулі болуы, жариялану процесіне әсер ететіндігі айтылды.
DALAMEDIA admin
11
0