Әлеуметтік желілерде кең тараған “Құпия Санта” ойынына қатысу кезінде азаматтар банк картасының нөмірі мен жеке мәліметтерін ашық жариялап жатыр. Мамандар мұның алаяқтық схемаларға жол ашатынын, тіпті қылмыстық жауапкершілікке әкелуі мүмкін екенін ескертті. 

Заңгерлердің айтуынша, карта нөмірін ашық жазу – интернет-алаяқтардың әрекетін жеңілдетеді. Егер қылмыскердің ақшасы сіздің шотыңызға түскен жағдайда, адам дроппер ретінде танылып, Қылмыстық кодекстің 232-1-бабымен жауапқа тартылуы ықтимал. Сонымен қатар, негізсіз түскен қаражат Азаматтық кодекстің 953-бабы бойынша өндіріліп алынады.

Мемлекеттік кірістер комитеті де ескерту жасады:

егер жеке тұлға үш ай ішінде 100-ден көп адамнан, жалпы сомасы 1 020 000 теңгеден асатын аударым алса, оны кәсіпкерлік табыс ретінде қарастырып, тексеруге жіберуі мүмкін.

Мамандар “Құпия Сантаны” тек таныс ортада, жеке деректерді жарияламай ойнауға кеңес береді.