Dalamedia — Полиция қызметкерлері мереке күндері алаяқтардың белсенділігі артатынын ескертті. Олар азаматтардың сыйлық пен жеңілдікке деген қызығушылығын пайдаланып, түрлі айлаға баруы мүмкін.

Құқық қорғау органдарының мәліметінше, кең тараған тәсілдердің бірі - жалған жаңа жылдық ашықхаттар тарату. Сондай-ақ мамандар музыкасы немесе анимациясы бар құттықтауларды ашқан сәтте құрылғыға вирус еніп, банк карталары мен жеке деректерге қол жеткізуі мүмкін екенін ескертеді.

Сондай-ақ алаяқтар тауарлар мен сыйлықтарды нарықтан әлдеқайда арзан бағада сататынын хабарлап, шұғыл ақша аударуға көндіреді. Қаражат түскен соң хабарландыру өшіріліп, байланыс үзілетін жағдайлар жиі кездеседі.

Полиция алаяқтардың жалған аккаунттар мен қолдан жасалған пікірлер арқылы сенімге кіретінін атап өтті. Осыған байланысты азаматтарды күмәнді ұсыныстардан бас тартып, ақпарат көздерін мұқият тексеруге шақырады.