АСТАНА. DALAMEDIA - Елімізде қоғамды жік-жікке бөлетін белгілерге қарсы талап күшеймек. Алдағы уақытта футболка мен шапан секілді киімдерге ру атауын жазуға тыйым салу мәселесі талқыда. Сонымен қатар отандық фильмдердің мазмұнын алдын ала тексеретін көркемдік кеңес құру мәселесі көтерілді.

Бұл бастамалар халықты ру-тайпаға бөліп, ел ішіне іріткі салатын әрекеттерге жол бермеуді көздейді. Егер фильмде рулар бір-біріне қарсы қойылып, арандатушылық сипат анықталса, ондай туындының экранға шығуына шектеу қойылуы мүмкін.

Мәжіліс депутаты Ерлан Саировтың айтуынша, соңғы уақытта мұндай мазмұндағы кинолардың көбеюіне контентке бақылаудың әлсіздігі себеп болған. Соның салдарынан қоғамда бірлікке сызат түсіретін фильмдер жарық көруде.

Депутат отандық мәдени өнімдерді көркемдік, идеологиялық және ұлттық бірлік тұрғысынан сараптайтын тұрақты комиссия құру қажет екенін атап өтті. Бұл құрылым рушылдық пен жікшілдікті насихаттауға нақты тосқауыл қоюы тиіс.