Президент Қасым-Жомарт Тоқаев Ұлттық қауіпсіздік комитетінің өкілеттіктерін кеңейтетін жарлыққа қол қойды. Құжат 1996 жылғы ҰҚК туралы Ережеге түзетулер енгізіп, ведомствоның қаржылық мониторинг және мемлекеттік материалдық резервтерді басқару саласындағы рөлін күшейтеді.   

Қаржылық мониторинг

ҰҚК уәкілетті органдарға өз ақпараттық жүйелеріндегі деректерді ұсынатын болады. Бұл ақпарат төмендегі бағыттардағы құқықбұзушылықтарға қарсы іс-қимылды күшейту үшін қажет:

қылмыстық жолмен алынған табысты заңдастыру,

терроризмді қаржыландыру,

жаппай қырып-жою қаруын тарату.

Мемлекеттік және мобилизациялық резервтер

Жарлыққа сәйкес, ҰҚК-не:

материалдық құндылықтардың номенклатурасы мен сақтау көлемдерін ұсыну;

мобилизациялық резервтен құндылықтарды шығару мәселелерін шешу;

қорларды сақтау, жаңарту және тасымалдауды ұйымдастыру;

сақтау шығындары бойынша Үкіметке ұсыныстар енгізу құзыреті берілді.

Негізгі нормалар 9 желтоқсанда күшіне енді. Ал материалдық резервтерге қатысты жекелеген ережелер 2027 жылғы 1 қаңтардан бастап қолданылады.

Еске салайық, бұған дейін Тоқаев Сыбайлас жемқорлыққа қарсы қызметті қайта ұйымдастырып, оны ҰҚК құрылымына біріктірген еді. Сондай-ақ Президент 2026 жылдан бастап QazTech платформасынан тыс жаңа IT-жүйелер әзірлеуге мораторий енгізетін цифрландыру жөніндегі жарлыққа қол қойған болатын.