Қазақстан Ұлттық қауіпсіздік комитеті 2025 жылдың қыркүйек айында Алматы қаласында бес шетелдік азамат жоспарлаған террорлық әрекетті дайындық кезеңінде анықтап, оның алдын алды. Барлық күдіктілер қамауға алынып, тергеу амалдары жүргізілуде.

ҰҚК хабарлауынша, қыркүйек пен қазан айларында терроризмді насихаттады деген күдікпен сегіз қазақстандық азамат ұсталып, оларға қатысты қылмыстық істер қозғалған. Тергеудің өзге деректері әзірге жария етілмейді.

Сол кезеңде терроризм мен экстремизмге байланысты қылмыстар үшін алты адам түрлі мерзімге бас бостандығынан айырылған. Жалпы, жыл басынан бері осындай қылмыстар бойынша 89 тұлға қылмыстық жауапкершілікке тартылған, оның ішінде алтауы - шетел азаматы.

Айта кетейік, 25 қазанда Мемлекет басшысы Қасым-Жомарт Тоқаев ҰҚК төрағасы Ермек Сағымбаевты қабылдап, комитеттің жыл басынан бергі жұмысының қорытындысын және алдағы міндеттерін тыңдады. Кездесу қорытындысы бойынша Президент ұлттық қауіпсіздік органдарына бірқатар нақты тапсырмалар берді.