Қазақстан Президенті Қасым-Жомарт Тоқаев «Қазақстан Республикасындағы цифрландырудың кейбір мәселелері туралы» Жарлыққа қол қойды. Құжат мемлекеттік секторда бірыңғай платформалық тәсілге көшу тәртібін бекітеді 

Жарлыққа сәйкес, 2026 жылдың 1 қаңтарынан бастап мемлекеттік органдар мен квазимемлекеттік сектор субъектілері электрондық үкіметтің QazTech платформасынан тыс жаңа ақпараттандыру объектілерін әзірлей алмайды.

Егер белгілі бір жүйені QazTech негізінде іске асыру мүмкін болмаса, әрбір жағдай Президент жанындағы цифрландыру жөніндегі комиссияның қарауына шығарылуы тиіс.

Сонымен қатар, мемлекеттік органдар мен квазимемлекеттік сектор ұйымдары платформалық модельге кезең-кезеңімен көшуді қамтамасыз етуі керек. Жарлықтың орындалуын бақылау Президент Әкімшілігіне жүктелді. Құжат 2025 жылдың 9 желтоқсанында қол қойылған күнінен бастап күшіне енді.

Еске сала кетейік, биылғы тамыз айында мемлекеттік органдардың QazTech платформасына көшу жұмыстары басталғаны хабарланған болатын. Сондай-ақ ақпараттық жүйелердің меншік иелеріне ресурстарға қолжетімділік талаптарын күшейту, 1414 қысқа нөмірінен SMS жіберу механизмдерін неғұрлым қауіпсіз аутентификация құралдарымен алмастыру тапсырылды.