Астанадағы медицина колледжінде биыл қарашада қайғылы жағдайда көз жұмған фельдшер Ұлдана Мырзуанның құрметіне арнайы оқу аудиториясы ашылады. Бұл туралы Денсаулық сақтау министрі Ақмарал Әлназарова Мәжіліс кулуарында айтты.
Министрдің айтуынша, оқыс оқиғаға байланысты тергеу жалғасып жатыр. Құрылыс талаптарының сақталуы мен қауіпсіздік нормаларына қатысты сұрақтар көп.
Құрылыс нормаларының бұзылған болуы мүмкін екені тексеріліп жатыр, — деді Ақмарал Әлназарова.
Ол сондай-ақ министрлік бастамасымен Ұлдана Мырзуан білім алған колледжде оның аты берілетін арнайы аудитория ашу жоспарланып отырғанын жеткізді.
Еске сала кетейік, Тәуелсіздік даңғылы бойындағы тұрғын үй кешенінің қасбетінен құлаған кірпіш қаптамасы мен кондиционер салдарынан бес адам зардап шеккен еді. Сол оқиғада ауыр жараланған 23 жастағы фельдшер Ұлдана Мырзуан 18 қарашада ауруханада қайтыс болды.
DALAMEDIA admin
8
0