Тергеу нұсқасына сәйкес, халықтан жиналған 1,3 млрд теңгенің небәрі 6,4 млн теңгесі ғана баланың нақты еміне жұмсалған. Қалған қаражат, тергеу мәліметінше, пәтер мен автокөлік сатып алуға, жарнамалық кампанияларға, сондай-ақ букмекерлік кеңселерде ставка жасауға кеткен.
Қоғамда үлкен резонанс тудырған істің осы кезеңіне келгенде заңгерлер пікір білдіруде. Заң саласының маманы Аян Мырзахан бұл үдерістің ашықтығы маңызды екенін айтады:
«Бұл тек бір отбасының ісі емес, жалпы қайырымдылыққа деген сенімнің тағдыры. Сотта әр тиынның қайда жұмсалғаны дәлелденуі тиіс. Үкім әділ шықса ғана қоғамдағы күмән сейіледі», – дейді маман.
Соттың соңғы сөзі енді тараптардың соңғы уәждерінен кейін белгілі болмақ. Үкім жақын күндері жарияланады деп күтіледі.