Жамбыл облысының Байзақ ауылында кәмелетке толмағандар арасындағы төбелестен кейін 2011 жылы туған жасөспірім қаза тапты, — деп хабарлайды «Dalamedia» ақпараттық порталы.

Оқиға 3 қазан күні кешкі уақытта болған. Сағат 22:00 шамасында жасөспірімдер арасында жанжал шығып, арты төбелеске ұласқан. Соның салдарынан 2011 жылы туған жасөспірім дене жарақатын алған. Кейін ол алған жарақатынан көз жұмды.

Аталған дерек бойынша полиция Қылмыстық кодекстің 106-бабының 3-бөлігімен қылмыстық іс қозғады. Бұл бап денсаулыққа қасақана ауыр зиян келтіріп, соның салдарынан жәбірленушінің өліміне әкеп соққан жағдайларға қатысты.

Жанжалға қатысушылардың бірі ұсталып, уақытша ұстау изоляторына қамалды.

Полицияның мәліметінше, қазір тергеу жұмыстары жалғасып жатыр. Қылмыстық іс Жамбыл облысы полиция департаменті басшылығының бақылауында.