Қазақстанда көлік тіркеу, жүргізушілерді даярлау және куәлік беру ережелеріне бірқатар өзгеріс енгізілді, — деп хабарлайды «Dalamedia» ақпараттық порталы.

Ішкі істер министрлігінің жаңа бұйрығы Әділет министрлігінде тіркеліп, Цифрлық даму және жасанды интеллект министрлігімен келісілген. Жаңа талаптардың басым бөлігі ресми жарияланғаннан кейін 10 күн ішінде күшіне енсе, кей нормалар 2026 жылдың 12 шілдесінен бастап қолданылады.

Жүргізушілер үшін ең маңызды жаңалықтардың бірі — куәліктегі беріліс қорабына қатысты шектеудің алынуы. Бұған дейін автоматты көлікпен емтихан тапсырған азаматтар механикалық қораптағы көлікті жүргізе алмайтын. Енді бұл талап жойылады.

Сонымен қатар жүргізуші куәлігі цифрлық форматта қолжетімді болады. Азаматтар құжатты eGov mobile қосымшасындағы цифрлық құжаттар сервисі арқылы пайдалана алады. Ал дайын болып, уақытында алынбаған пластикалық куәліктер халыққа қызмет көрсету орталықтарында небәрі 30 күн сақталып, кейін жойылады.

Жаңа өзгерістердің тағы бірі — көлікті толықтай онлайн рәсімдеу мүмкіндігі. Енді автокөлікті сатып алу-сату мәмілесін нотариуссыз-ақ, электронды цифрлық қолтаңба арқылы eGov порталы немесе банк қосымшалары көмегімен жасауға болады.

Жүйе автоматты түрде көліктің іздеуде бар-жоғын, айыппұл мен шектеулердің бар-жоғын тексереді. Содан кейін сатып алушы көлікті өз атына тіркеуді растайды. Барлық тексеріс аяқталған соң, тіркеу құжаттары автоматты түрде рәсімделеді.

Жеке тұлғаны растау кезінде енді биометриялық сәйкестендіру де қолданылады. Бұл талап көлік тіркеу мен мемлекеттік қызметтердің негізгі кезеңдерінде міндетті болады.

Көліктерді тексеру жүйесі де толық цифрлық форматқа көшіріледі. Полиция қызметкерлері көлік пен оның нөмірлерін фотоға түсіріп, электронды акт рәсімдейді. Ол 14 күнге дейін жарамды болады.

Егер көліктің сәйкестендіру нөмірі өзгертілген, өшірілген немесе көлік іздеуде болса, тіркеуге рұқсат берілмейді. Мұндай ақпарат автоматты түрде полиция базасына жіберіледі.

Алғашқы тіркеу кезінде көліктерге міндетті электронды паспорт енгізіледі. Сондай-ақ азаматтар өз атына тіркелген көліктер туралы цифрлық анықтаманы eGov немесе банк қосымшалары арқылы 20 минут ішінде тегін ала алады.

Жаңа ережелер автомектептерге де қатысты. Енді жүргізушілерді даярлау толықтай «Автомектеп» цифрлық жүйесі арқылы бақыланады. Жүйе оқу топтарын автоматты түрде тексеріп, талап бұзылған жағдайда шектеу қояды.

Теориялық емтиханнан өту үшін үміткер кемінде 32 сұраққа дұрыс жауап беруі тиіс. Ал жауап берілмеген сұрақтар қате жауап ретінде есептеледі.

Министрлік бұл өзгерістер көлік тіркеу мен жүргізушілерді даярлау саласын толық цифрландырып, рәсімдерді жеңілдетуге мүмкіндік береді деп отыр.