Жүргізуші куәлігін сату арқылы қыруар қаржы тапқан мамандар ұсталды — деп хабарлайды «Dalamedia» ақпараттық порталы.

Астана, Ақмола және Павлодар облыстарында ХҚКО қызметкерлерінің заңсыз әрекеттері әшкереленді. Олар жүргізуші куәліктерін ақшаға рәсімдеп отырған. Ұлттық қауіпсіздік қызметінің Сыбайлас жемқорлыққа қарсы құрылымы 2026 жылдың басынан бері автомектептер мен жүргізуші куәлігін беру саласында бірқатар заңбұзушылықты анықтаған. Тергеу барысында пара алу, қызметтік өкілеттікті теріс пайдалану деректері тіркелген.

Мәселен, Астанада Мамандандырылған ХҚКО-ның бұрынғы басшы орынбасары жүйелі түрде заңсыз сыйақы алып, азаматтарды емтиханнан «өткізіп», жүргізуші куәлігін алуға көмектесіп келген. Ресми мәліметке сәйкес, осындай 60-тан астам дерек тіркеліп, олардың жалпы сомасы 100 миллион теңгеден асқан.

Сонымен қатар Көкшетаудағы Мамандандырылған ХҚКО мен Екібастұздағы «Азаматтарға арналған үкімет» филиалының басшылары да заңсыз әрекеттерімен ұсталған. Олар емтиханды басқа адамдар арқылы тапсыруды ұйымдастырып, бұл қызметі үшін ақша алып отырған.

Бұдан бөлек Астана, Шымкент және Тараз қалаларындағы «Азаматтарға арналған үкімет» филиалдарында жылжымайтын мүлікті қайта рәсімдеу кезінде де қызметтік өкілеттікті асыра пайдалану және заңсыз табыс табу деректері анықталған.

Қазіргі таңда аталмыш фактілер бойынша сотқа дейінгі тергеу жүргізіліп жатыр.