Жаңа жыл мерекесіне байланысты халыққа қызмет көрсету орталықтарының жұмыс кестесі белгілі болды. Бұл туралы «Азаматтарға арналған үкімет» мемлекеттік корпорациясы хабарлады.

Жарияланған деректерге сәйкес, 1, 2 және 7 қаңтар күндері барлық ХҚКО, соның ішінде автокөлік иелеріне қызмет көрсететін мамандандырылған орталықтар жұмыс істемейді.

Ал 3 қаңтар, сенбі күні кезекші орталықтар азаматтарды қабылдай бастайды. Бұл күні қызмет көрсету уақыты 9:00-ден 13:00-ге дейін шектеледі.

5 және 6 қаңтар ресми түрде жұмыс күндері болып есептеледі. Осыған байланысты барлық ХҚКО әдеттегі тәртіпте жұмыс істейді. Азаматтарды қабылдау 9:00-де басталып, 18:00-де аяқталады.

Кезекші және мамандандырылған орталықтардың жұмыс кестесі өзгеріссіз қалады: дүйсенбіден жұмаға дейін 9:00-ден 20:00-ге дейін, ал сенбі күні 9:00-ден 13:00-ге дейін қызмет көрсетеді.

Мекеме өкілдері тұрғындарға уақытын тиімді жоспарлау үшін осы кестені ескеруді ұсынады.