2026 жылдың 12 шілдесінен бастап Қазақстанда әлеуметтік осал топтарға жалдамалы тұрғын үй беру бағдарламасына қатысты жаңа бақылау ережелері күшіне енеді, ,-деп хабарлайды «Dalamedia» ақпараттық порталы.

Жаңа тәртіпке сәйкес, әкімдіктер мемлекет субсидиялайтын пәтерлерде азаматтардың нақты тұрып жатқанын тексеру бойынша қосымша өкілеттікке ие болады.

Бағдарлама аясында мұқтаж азаматтарға жалға берілетін баспананың 50 пайызға дейінгі ақысы өтеледі. Енді бюджет қаражатының заңсыз рәсімделуіне жол бермеу үшін бақылау тетіктері күшейтілмек.

Өнеркәсіп және құрылыс министрлігі мен Отбасы банк мәлімет алмасудың ортақ цифрлық жүйесін енгізеді. Бұл деректердегі сәйкессіздіктерді анықтауға мүмкіндік береді. Министрліктің бас сарапшысы Дәубек Керімбаевтың айтуынша, мұндай тексерулер бұрын да болған. Алайда енді әкімдік қызметкерлерінің пәтерлерге баруы тұрақты түрде жүргізіледі.

Негізгі мақсат — субсидия рәсімделген пәтерде шынымен сол көмекке құқығы бар азаматтың тұрып жатқанын растау.

Бұл өзгеріс қоғамда түрлі пікір туғызды. Қоғам белсендісі Гүлнар Омарова мұндай бақылау кей азаматтардың жеке өміріне араласу ретінде қабылдануы мүмкін екенін айтады. Әсіресе әлеуметтік қиын жағдайдағы отбасыларға бұл қосымша қысым болуы ықтимал.

Ал заңгерлер әкімдік қызметкерлерінің тұрғын үйге күштеп кіре алмайтынын ескертеді. Барлық тексеру заң талаптарына сай жүргізілуі тиіс.

Айта кетейік, мемлекеттік тұрғын үй субсидиясы көпбалалы отбасыларға, жетім балаларға, I және II топтағы мүгедектігі бар азаматтарға, сондай-ақ мүгедек бала тәрбиелеп отырған отбасыларға беріледі. Сонымен қатар отбасының әр мүшесіне шаққандағы орташа айлық табыс ең төменгі күнкөріс деңгейінен — 50 851 теңгеден аспауы қажет.