Таразда жаяу жүргіншілер өткелінен өтіп бара жатқан жүкті әйелді көлік қағып кеткен. Тұрғынның айтуынша, жол апатынан кейін денсаулығына байланысты қиындықтар туындаған. Ол оқиғадан кейін сот-медициналық сараптама уақытында жүргізілмегеніне шағымданды, — деп хабарлайды «Dalamedia» ақпараттық порталы.

Әйелдің айтуынша, жол-көлік оқиғасы 14 қыркүйекте Төле би көшесінде болған. Қара түсті көлік жаяу жүргіншілер өткелінен өтіп бара жатқан оны қағып кеткен. Жол апатынан кейін дәрігерлер ми шайқалғанын анықтап, жүктілігіне байланысты асқынулар болған.

Тұрғынның сөзінше, оқиғадан кейін істің қалай қаралып жатқаны жөнінде тиісті ақпарат берілмеген. Сонымен қатар сот-медициналық сараптама бірден жүргізілмегенін айтқан.

Ол құзырлы органдардан жол-көлік оқиғасының барлық мән-жайын анықтап, алған жарақаттарын заң аясында тіркеуді және істі объективті қарауды сұрады. Тұрғынның айтуынша, арада екі апта өтуі кейбір жарақаттарды бастапқы күйінде тіркеуді қиындатуы мүмкін.

Әйел көлік жүргізген адамның жас қыз болғанын айтып, мақсаты біреуді жазалау емес екенін атап өтті. Оның негізгі талабы – оқиғаның толық әрі әділ қаралуы.

Оқиғаға байланысты Жамбыл облысының полиция департаменті де пікір білдірді. Ведомствоның мәліметінше, жол-көлік оқиғасына қатысы бар Volkswagen Golf көлігінің жүргізушісі анықталған.

«Жүргізушіге қатысты Әкімшілік құқық бұзушылық туралы кодекстің 610-бабы 2-бөлігі бойынша әкімшілік хаттама толтырылды. Қазір іс бойынша сот-медициналық сараптама тағайындалды. Оның қорытындысына сәйкес тиісті процестік шешім қабылданады», – деп хабарлады полиция департаменті.

Аталған бап бойынша 2026 жылғы қолданыстағы редакцияға сәйкес, 40 айлық есептік көрсеткіш мөлшерінде айыппұл салу немесе көлік құралын басқару құқығынан 9 айға дейін айыру қарастырылған.