Алматыда электрсамокат мінген белгісіз адам жаяу жүргіншіні қағып, оқиға орнынан бой тасалаған. Бұл жағдай қаладағы жеке қозғалыс құралдарына қатысты қауіпсіздік мәселесін қайта көтерді, –деп хабарлайды «Dalamedia» ақпараттық порталы.

Оқиға 14 сәуір күні Төле би көшесінде болған. Желі қолданушысы Threads платформасында жазба қалдырып, жоғары жылдамдықпен келе жатқан самокат өзіне соғылғанын айтқан. Соққының қатты болғаны сонша, ол бірнеше метр жерге құлап түскен.

Жәбірленушінің сөзінше, сол сәтте заттары жан-жаққа шашылып кеткен: телефонының экраны сынған, бір кроссовкасы бөлек жерде қалған. Ең сорақысы — самокат жүргізушісі тоқтамай, оқиға орнынан кетіп қалған.

Куәгерлердің айтуынша, самокатта екі адам болған және олар өте жоғары жылдамдықпен жүрген. Оқиғадан кейін айналадағы адамдар жәбірленушіге көмектесіп, жедел жәрдем мен полиция шақырған.

Аталған дерек бойынша арыз тіркелгенімен, жәбірленуші істің баяу қозғалып жатқанын айтады. Оның сөзінше, құқық қорғау органдары самокат жүргізушісінің кім екенін анықтай алмай отыр.

Алматы қалалық полиция департаменті бұл факті бойынша тексеру жүргізіліп жатқанын мәлімдеді. Құқық қорғаушылардың айтуынша, оқиғаның мән-жайын анықтау үшін бейнебақылау камералары қаралып, кикшеринг компанияларына да ресми сұрау жолданған.

Сондай-ақ полиция бұл істің бақылауда екенін және құқық бұзушыны анықтау жұмыстары жалғасып жатқанын жеткізді. Ведомство мәліметінше, қалада микромобильді көлік құралдарына қатысты тәртіпті күшейту мақсатында жүйелі жұмыстар жүргізіліп келеді.

Айта кетейік, бұған дейін Алматыда самокат қағып кеткен жасөспірім ауыр жарақат алып, мүгедек болып қалған жағдай тіркелген еді.