Астана–Павлодар тас жолында болған жол-көлік оқиғасынан 21 жастағы студент Талғат Емел ауыр жарақат алып, екі аяғынан айырылды. Қазір оның отбасы жүргізушінің жауапкершіліктен жалтарып кетпеуін талап етіп отыр, — деп хабарлайды «Dalamedia» ақпараттық порталы.

Оқиға 29 мамырда болған. Талғат қорытынды емтихандарын аяқтаған соң, Hyundai Tucson көлігімен Павлодарға қайтып келе жатқан. Алдын ала мәлімет бойынша, көлік жол жиегіндегі қоршауға соғылып, темір бөлік салон ішіне кірген. Соққы артқы орында отырған жолаушыға тиген.

Көлікті 22 жастағы Ердәулет Зәкіров басқарған. Оның әкесі — Арыс қаласының әкімі Қайсар Манқараев. Аталған дерек бойынша Қылмыстық кодекстің 345-бабы 2-бөлігімен, яғни жол қозғалысы ережесін бұзып, абайсызда адамға ауыр зиян келтіру фактісі бойынша қылмыстық іс қозғалған.

Талғаттың туыстары оның алдағы оңалтуына қомақты қаражат қажет екенін айтады. Олардың сөзінше, бір аяққа жасалатын ем-шара шығыны шамамен 70 миллион теңгеге жетуі мүмкін. Отбасы өкілдерінің айтуынша, жүргізуші тарапынан алғашқы уақытта дәрі-дәрмек алуға және студенттің велосипедіне өтемақы төлеуге ғана көмек көрсетілген. Кейін байланыс үзілгенін жеткізді.

Туыстарының айтуынша, апаттан кейін Талғат ауыр жағдайда болса да, көліктен өзі шыққан. Оның қолы да сынған. Алайда олардың сөзінше, жүргізуші тарапынан жеткілікті көмек көрсетілмеген.

Қазір студенттің денсаулығы күрделі жағдайда. Көп қан жоғалту салдарынан ағзасында асқынулар пайда болған. Сонымен қатар апаттан кейін есте сақтау қабілетінде қиындықтар байқалған.

Талғаттың ата-анасы ұлына күтім жасау үшін Павлодардағы жұмыстарын тастап, Астанаға көшкен. Отбасы жүргізушінің жауапкершіліктен босап кетуінен қауіптеніп, Бас прокуратураға, Ішкі істер министрлігіне және сот органдарына жүгінген.

Жәбірленуші тараптың айтуынша, жүргізуші бұған дейін бірнеше рет жол ережесін бұзған. Олар оның үйқамаққа алынуына да қарсылық білдіріп отыр.

Павлодар облыстық полиция департаменті аталған жол апаты бойынша тергеу жүріп жатқанын хабарлады. Ведомство мәліметінше, оқиға кезінде үш жолаушы ауруханаға жеткізілген. Көлік арнайы тұраққа қойылған.

Ал Қайсар Манқараев болған жағдайды растады. Ол ұлының көлік жүргізгенін айтып, тергеу жұмыстарына араласпайтынын және мәселе заң аясында шешілетінін жеткізді.

«Бұл жағдай менің отбасым үшін де ауыр сынақ болды. Жарақат алған азаматқа және оның жақындарына қолдау білдіремін. Ұлым — кәмелетке толған азамат, ол өз әрекеті үшін заң алдында жауап береді», — деді әкім.