Түркістан облысында волейболдан жарысқа бара жатқан 8-сынып оқушылары отырған көлік жол апатына ұшырап, үш жасөспірім қаза тапты, — деп хабарлайды «Dalamedia» ақпараттық порталы.

Қайғылы жағдай Шардара–Байырқұм тас жолында болған. Жарысқа жолға шыққан оқушылар мінген жеңіл көлікті қарсы бағытта келе жатқан «КамАЗ» жоғары жылдамдықпен соққан. Соққыдан кейін «Chevrolet Cobalt» көлігі аударылып, қатты зақымданған. Салдарынан 14 жастағы бір оқушы оқиға орнында жан тапсырған.

Белгілі болғандай, 8-сынып оқушыларынан құралған команда облыстық турнирге Арыс қаласына бет алған. Оларды жарысқа апара жатқан 34 жастағы жаттықтырушы ауыр жарақат алып, қазір ауруханада жатыр. Команда екі көлікпен шыққан, екінші көліктегі сегіз бала аман қалған.

Көкарал ауылы №46 мектептің мұғалімі Айдана Тұрсынованың айтуынша, марқұм оқушылар спортқа бейім, белсенді болған. Олар мектепішілік және аудандық жарыстарда үнемі жүлделі орын иеленіп жүрген. Мұғалімнің сөзінше, балалар жарысқа үлкен үмітпен аттанып, жеңіспен оралуды мақсат еткен.

Қайғылы оқиғадан кейін үш отбасы перзенттерінен айырылып отыр. Марқұмдар 24 сәуір күні жер қойнына тапсырылған.

Қазіргі уақытта полиция жол-көлік оқиғасына қатысты қылмыстық іс қозғап, жүк көлігінің жүргізушісін қамауға алған. Түркістан облыстық полиция департаменті өкілдерінің мәліметінше, балаларды тасымалдау туралы тиісті мемлекеттік органдарға алдын ала хабар берілмеген.

Сондай-ақ құқық қорғау органдары балалардың қауіпсіздігін қамтамасыз ету міндеттерін тиісінше орындамау дерегі бойынша да тергеу жүргізіп жатыр. Оқиғаның барлық мән-жайы анықталуда.

Қаза тапқан оқушылардың екеуі — Қанабек Төлебай мен Нұрсұлтан Ташболат — соңғы екі жылда түрлі турнирлерге қатысып, жақсы нәтижелер көрсеткен. Мұғалімдерінің айтуынша, олар облыстық құрама сапына қосылуға жақын тұрған дарынды спортшылар болған.