Қызылорда қаласындағы демалыс саябақтарының бірінде болған қайғылы оқиға салдарынан 18 жастағы жігіт ауыр жарақат алды, ,-деп хабарлайды «Dalamedia» ақпараттық порталы.

Әлеуметтік желілерде тараған бейнежазбаға қарағанда, оқиға қалалық «Арай» саябағындағы аттракциондардың бірінде болған. Жазба авторларының мәліметінше, ойын құрылғысы жас жігітті басып қалған.

Аталған деректі Қызылорда облыстық полиция департаменті растады. Ведомствоның хабарлауынша, еңбек қауіпсіздігі талаптарын сақтамау салдарынан адам денсаулығына ауыр зиян келтіру фактісі бойынша қылмыстық іс қозғалған.

Қазір тергеу жүргізіліп жатыр. Құқық қорғау органдары оқиғаның барлық мән-жайын анықтауға бағытталған қажетті шараларды қолға алған. Іс бойынша түпкілікті шешім тергеу нәтижесіне сәйкес қабылданады.

Облыстық көпсалалы аурухананың мәліметінше, 2007 жылы туған азамат медициналық мекемеге өте ауыр жағдайда жеткізілген. Дәрігерлер шұғыл түрде ота жасап, оның сол аяғын сан тұсынан, ал оң аяғын тобық деңгейінен ампутациялауға мәжбүр болған.

Аурухананың бас дәрігері Жасұлан Баймахановтың айтуынша, науқастың жағдайы ауыр жарақаттарға байланысты аса ауыр күйде бағаланып отыр.