Алматыдағы Family Park аумағына қатысты жер дауы қайта көтерілді. Бүгін қалалық «AMANAT» партиясы филиалында өткен «Жер Аманаты» комиссиясының отырысында саябақ жерін пайдалану заңдылығы қаралды, — деп хабарлайды «Dalamedia» ақпараттық порталы.

Бұл мәселенің күн тәртібіне шығуына тұрғындардан түскен көп шағым себеп болған. Әсіресе саябақтың қазіргі жағдайына қатысты наразылық көбейген. Бұған дейін Алматы мәслихаты депутаттары мен қоғамдық кеңес мүшелері парк аумағына арнайы мониторинг жүргізіп, бірқатар кемшілікті анықтаған.

Тексеру барысында саябақтағы санитарлық жағдайдың нашарлағаны, инфрақұрылымның ескіргені, аттракциондардың қауіпсіздігіне қатысты күмән бар екені белгілі болған. Сонымен қатар жасыл желектердің күтімсіз қалғаны және демалыс орнының ұзақ уақыт бойы жаңартылмағаны айтылды.

Алматы қалалық «AMANAT» партиясы филиалының төрағасы Станислав Канкуров Family Park мәселесі енді жеке кәсіп аясынан шығып кеткенін айтты. Оның сөзінше, бұл — мыңдаған алматылық демалатын маңызды қоғамдық орын.

Ол жерді пайдаланушы өз міндетін дұрыс атқармаса, тұрғындарға қауіпсіз әрі қолайлы жағдай жасалмаса, заң аясында қатаң шаралар қабылдануы мүмкін екенін жеткізді. Тіпті нысанды мемлекет меншігіне қайтару мәселесі де қарастырылатынын атап өтті.

Ал Жер ресурстарын басқару департаментінің басшысы Ержан Ташпенбетов тексеру кезінде жер телімін рәсімдеу барысында заңбұзушылықтар анықталғанын мәлімдеді.

Оның айтуынша, жердің нысаналы мақсатын өзгерту мен жалға беру кезінде бастапқы жер пайдалану құқығы заң талаптарына сай рәсімделмеген. Осыған байланысты тиісті нұсқамалар берілген. Егер талаптар белгіленген мерзімде орындалмаса, әкімдік қаулысы мен жерді жалға беру келісімін жарамсыз деп тану үшін сотқа талап-арыз жолданады.

Айта кетейік, бұған дейін Алматы прокуратурасы Медеу өңірлік табиғи паркі маңындағы жалпы аумағы 288 гектар болатын екі жер телімінің заңсыз жекеменшікке өтіп кеткенін анықтаған еді. Кейін сот шешімімен құны 17 миллиард теңгеден асатын жер мемлекетке қайтарылған.