Тараз қаласында №40 гимназия аумағында мектеп оқушысы биіктіктен құлап, ауыр жарақат алды. Оқиғаны Жамбыл облыстық полиция департаменті растады, — деп хабарлайды «Dalamedia» ақпараттық порталы.

Ведомство мәліметінше, аталған дерек бойынша Қылмыстық кодекстің 114-бабының 3-бөлігі — «Абайсызда ауыр дене жарақатын келтіру» бойынша іс қозғалған. Қазіргі уақытта полиция қызметкерлері оқиғаның мән-жайын жан-жақты тексеріп жатыр. Тергеу қорытындысына сәйкес тиісті процессуалдық шешім қабылданады.

Сондай-ақ, құқық қорғау органдары Қылмыстық іс жүргізу кодексінің 201-бабына сай тергеу мүддесіне байланысты өзге мәліметтер жария етілмейтінін мәлімдеді.

БАҚ-та тараған ақпаратқа қарағанда, 10-сынып оқушысы ғимараттың сыртындағы өрттен эвакуациялануға арналған баспалдаққа шыққан. Бейнебақылау жазбаларында оның баспалдақ қоршауында отырғаны көрінеді. Алайда бір сәтте тепе-теңдігін жоғалтып, төменге құлап кеткен.

Оқушы дереу облыстық балалар ауруханасына жеткізілген. Дәрігерлер оның жағдайын өте ауыр деп бағалап отыр. Жасөспірімге ми жарақаты, оң жақ сан сүйегінің және бұғана сүйегінің сынуы, сондай-ақ ішкі ағзалардың зақымдануы диагнозы қойылған. Қазіргі уақытта ол жансақтау бөлімінде жатыр.