Әлеуметтік желілерде «диетасыз, спортсыз-ақ арықтаңыз», «бір айда 10-15 келі тастаңыз» деген жарнамалар жиі кездеседі. Алайда жылдам нәтиже беруге уәде ететін мұндай өнімдердің салдары кейбір әйелдер үшін денсаулыққа үлкен қауіп төндірген. Бірі ауруханаға түскенін айтса, енді бірі ағзасының ұзақ уақыт қалпына келгенін жеткізді, — деп хабарлайды «Dalamedia» ақпараттық порталы.

Динара Әділова алты жыл бұрын арықтататын өнімдердің бірін қабылдап көрген. Он күн бойы ішкенімен, салмағында өзгеріс болмаған. Керісінше, бір түнде жағдайы күрт нашарлап, тынысы тарылып, есінен танып қалған.

«Аяқ-қолым бағынбай, екі апта бойы орнымнан тұра алмадым. Кейін паникалық шабуылдар басталды», — дейді ол.

Кейін Динара мұндай жағдайға тап болған жалғыз адам емес екенін түсінген. Оның айтуынша, кейбір адамдар мұндай өнімдердің ағзадағы дәрумендер қорын азайтып, адамның психологиялық жағдайына әсер етуі мүмкін екенін жазған.

Ал Жадыра Играгим танысынан алған «Липоформ» атты арықтататын капсуланы қабылдаған. Өнімнің әсерін толық зерттемей бастаған ол көп ұзамай ұйқысының бұзылғанын, жүрек қағысының жиілегенін және тынысы тарылғанын байқаған.

«Түнде ұйықтай алмай отыратынмын. Бір күні бөлмедегі ойыншық аю маған қарап, басын изеп тұрғандай көрінді. Сол сәтте қатты қорықтым», — дейді ол.

Жадыраның сөзінше, капсула қабылдаған кезде тәбеті күрт төмендеп, 108 келіден 98 келіге дейін салмақ тастаған. Бірақ арықтаумен бірге әлсіздік пайда болып, гемоглобин көрсеткіші төмендеген. Өнімді тоқтатқаннан кейін жағдайы біртіндеп түзелген.

«Шашым уыстап түсті»

Ақбота есімді бойжеткен де әлеуметтік желідегі жарнамаға сеніп, былтыр Slim атты арықтататын дәрі сатып алған. Өнімге 22 мың теңге төлеген. Алайда оны қабылдағаннан кейін бірнеше күн ішінде денсаулығында өзгерістер байқалған.

«Екінші күннен бастап басым айналып, көзім қарауыта бастады. Кейін гемоглобинім түсіп кетті», — дейді ол.

Оның айтуынша, біраз уақыттан кейін шашы қатты түсіп, тырнақтары сынғыш болған. Сонымен қатар ашушаңдық пайда болып, етеккір циклі де бұзылған. Дегенмен күткен нәтижеге қол жеткізе алмағанын айтады. Дәрі арқылы небәрі төрт келі ғана салмақ тастаған.

Ақботаның айтуынша, оның анасы да арықтататын капсуланы қолданып көрген. Алғашында салмақ азайғанымен, кейін тамақ іше алмай, ас қабылдауы қиындаған. Дәріні тоқтатқан соң қайтадан салмақ қосқан.

«Бір өлімнен қалдым»

Шымкенттік Сабира әлеуметтік желідегі тікелей эфирден көрген арықтататын өнімді сатып алған. Сатушы оны «таза, жанама әсері жоқ, тек дәрумендерден тұрады» деп таныстырған.

Алайда өнімді қабылдағаннан кейін оның жағдайы нашарлаған.

«Басым ауырып, жүрегім айнып, құса бастадым. Кейін денемді іріңді жаралар басты. Тіпті жүре алмай қалдым. Арықтататын дәрі ішемін деп бір өлімнен қалдым», — дейді Сабира.

Ол мұндай өнімдердің емізулі әйелдерге де ұсынылатынына алаңдайды. Себебі оның бала денсаулығына қалай әсер ететіні белгісіз екенін айтады.

Сабира жағдайын сатушыға айтқанымен, тиісті қолдау болмағанын жеткізді. Ол әйелдерге белгісіз өнімдерді қабылдамай, маман кеңесіне жүгінуге шақырады.

«Өзімді қатты қинағанымды кейін түсіндім»

Ақтаулық Қарлыға да кезінде арықтау үшін түрлі әдістерді қолданып көрген. Ол «Редуксин», «Молекула», Pro Lipolitik, Fatzorb сияқты өнімдерді қабылдап, арықтататын кофе мен капсулаларды пайдаланған. Сонымен қатар майды ерітеді деген инъекциялар салдырған.

«Қазір ойласам, мұның бәрі өзіме жасаған үлкен қиянат екен. Салмағым азайғанымен, бұлшықетім де бірге кетіп, терім салбырап, шашым түсе бастады», — дейді ол.

Қарлығаның айтуынша, кейбір препараттарды үш күн ғана қабылдағанның өзінде жүрегі қатты соғып, ұйқысы бұзылып, аяқ-қолы ұйыған.

Қазір ол арықтауға деген көзқарасын өзгерткен. Оның айтуынша, басты мақсат — денсаулықты сақтау.

Маман арықтататын өнімдердің қаупін түсіндірді

Нутрициолог Маржан Қалымбеттің айтуынша, арықтататын шайлар мен дәрілердің көпшілігі майды ерітпейді. Олар көбіне ағзадағы суды шығарып, іш жүргізу арқылы уақытша нәтиже көрсетуі мүмкін.

Маман мұндай өнімдердің құрамында зәр айдайтын және іш жүргізетін заттар кездесетінін айтты. Оларды қолдану кезінде ағзадағы калий, натрий секілді маңызды элементтер азайып, әлсіздік, жүрек қағысының жиілеуі және басқа да мәселелер туындауы мүмкін.

«Препаратты қабылдаған кезде салмақ азайғандай көрінеді. Бірақ бұл майдың кеткенін білдірмейді. Көбіне ағзадағы су азайып, ішектегі заттар сыртқа шығады. Дәріні тоқтатқан соң салмақ қайта қосылуы мүмкін», — деді маман.

Нутрициологтың айтуынша, кейбір арықтататын өнімдердің құрамында кофеин мөлшері жоғары болады. Ол жүрек пен жүйке жүйесіне кері әсер етіп, ұйқысыздық, үрей, жүрек қағысының жиілеуі сияқты белгілерге әкелуі мүмкін.

Маман адамның іші жиі өтіп, жүрегі қысылып, тынысы тарылса немесе қатты әлсіздік байқалса, мұндай препараттарды қабылдауды тоқтатып, дәрігерге қаралу керектігін ескертті.

Оның айтуынша, арықтататын дәрілердің кері әсері бірден байқалмауы мүмкін. Кей жағдайда оларды ұзақ уақыт қолдану жүрекке, бауырға, гормондық жүйеге және ас қорыту мүшелеріне зиян келтіруі ықтимал.

Маман әлеуметтік желідегі жарнамаға сеніп, құрамы белгісіз өнімдерді өз бетінше қабылдау қауіпті екенін атап өтті. Арықтаудың қауіпсіз жолы — дұрыс тамақтану мен дене белсенділігін қалыптастыру екенін айтты.