Жетісу облысында теміржол бойында жалғыз жүрген төрт жасар баланы жүк пойызының машинисі байқап, қауіптің алдын алды, — деп хабарлайды «Dalamedia» ақпараттық порталы.

Оқиға 20 қыркүйекте Сарыөзек – Үштөбе теміржол учаскесінде болған. ҚТЖ мәліметінше, бала Айнабұлақ станциясына қарай иен далада жалғыз кетіп бара жатқан. Осы кезде Тауарасы – Айнабұлақ аралығымен келе жатқан жүк пойызының машинисі оны теміржол маңынан көріп қалған.

Пойыз сағатына шамамен 38 шақырым жылдамдықпен қозғалып келе жатқан. Машинист дереу тежегішті басып, құрамды тоқтатқан. Кейін баланы локомотив кабинасына отырғызып, болған жағдайды пойыз диспетчеріне хабарлаған.

Пойыз Айнабұлақ станциясына жеткен соң бала кезекші қызметкерге тапсырылды. Станция қызметкері оның ата-анасымен байланысқан.

Төрт жасар баланың далаға қалай шығып кеткені және теміржол маңында не себепті жалғыз жүргені әзірге белгісіз.