Жамбыл облысы аумағындағы Жаңатас стансасында екі локомотив соқтығысқан оқиға тіркелді. Бұл жөнінде әлеуметтік желілерде ақпарат тараған болатын, -деп хабарлайды «Dalamedia» ақпараттық порталы.

Алғашқы мәліметтерге қарағанда, стансадан шығып бара жатқан екі секциялы магистральдық 2ТЭ10М тепловозы «ҚТЖ»-ның маневрлік локомотивімен бетпе-бет келген. Маневрлік локомотив сол сәтте дизель отыны тиелген бес жүк вагонын, яғни цистерналарды алып келе жатқан.

Оқиғаға қатысты ресми түсініктемені Қазақстан темір жолы ұлттық компаниясы таратты. Компанияның хабарлауынша, жағдай маневрлік жұмыстар кезінде болған. 5 наурыз күні Жаңатас стансасында «Жаңатас Су-Жылу» коммуналдық кәсіпорнының кірме жолына мазут тиелген бес вагонды жеткізу барысында Жамбыл локомотив депосының маневрлік локомотив машинисі «КАП Логистик» ЖШС-нің жеке кірме жолындағы локомотивпен қатты соқтығысқан.

Компания дерегіне сүйенсек, оқиға салдарынан зардап шеккендер жоқ. Қазіргі таңда стансаға арнайы комиссия жіберіліп, соқтығыстың нақты себептері анықталып жатыр. Барлық жағдай зерттеліп, болашақта осындай оқиғалардың алдын алу шаралары қарастырылмақ.