Перуде Мачу-Пикчуға бағыт алған туристік маршрутта екі пойыз бетпе-бет соқтығысты. Апат салдарынан бір машинист қаза тауып, 30 жолаушы жарақат алды. Бұл туралы жергілікті билікке сілтеме жасаған La República басылымы хабарлады.

Қаза тапқан азамат - 61 жастағы машинист Роберто Карденас Лоиза. Ал, пойызда барлығы 54 адам болған. Жарақат алғандардың барлығы медициналық мекемелерге жеткізілді, кейбірі Куско қаласындағы ауруханаларға жіберілуі мүмкін.

Жол-көлік оқиғасы Урубамба провинциясының Оллантайтамбо ауданында, теміржолдың 82-шақырымында тіркелген. Апат орнына жедел қызмет өкілдері мен 12 жедел жәрдем бригадасы жұмылдырылды.

Қазіргі таңда пойыздардың соқтығысу себебі анықталып жатыр.