Теміржол билеттерінің құны тарифтерді жыл сайын индекстеу аясында өскен. Биыл билет бағасы 7 пайызға қымбаттады, — деп хабарлайды «Dalamedia» ақпараттық порталы.

Бұл туралы «Қазақстан темір жолы» ұлттық компаниясы басқарма төрағасының стратегия және цифрландыру жөніндегі орынбасары Ануар Ахметжанов мәлімдеді. Оның айтуынша, пойыз билеттерінің бағасы жыл бойы өзгеріссіз сақталады және маусымға немесе тәуліктің белгілі бір уақытына байланысты құбылмайды.

Компания өкілінің сөзінше, тарифтер жыл сайын Көлік министрлігімен келісілген тәртіп бойынша индекстеледі. Биылғы өсім 7 пайызды құраған. Ал өткен жылы елдегі инфляция деңгейі 12 пайыздан асқан.

Ануар Ахметжанов теміржол билеттерінің бағасы әуе тасымалындағыдай сұранысқа қарай өзгермейтінін атап өтті. Оның айтуынша, билет құны қаңтар айында қандай болса, желтоқсанға дейін сол деңгейде қалады.

Мәселен, кей бағыттарда билет бағасы шамамен 35 мың теңгені құрайды және ол жыл соңына дейін өзгермейді. Ал әуе компанияларында динамикалық баға жүйесі қолданылатындықтан, сұраныс артқан кезеңдерде билет құны 70-100 мың теңгеге дейін жетуі мүмкін.

Айта кетейік, бұған дейін Премьер-министр Олжас Бектенов «Қазақстан темір жолы» компаниясының транзиттік тасымалдар саласындағы жұмысын сынға алған болатын. Оның айтуынша, жоспарланған 23 миллион тонна жүктің орнына небәрі 16 миллион тонна жүк тасымалданған.

Үкімет басшысы транзиттік тасымал көлемі бойынша бекітілген көрсеткіштердің орындалуын қамтамасыз етуді тапсырып, бұл бағыттағы жауапкершілік ұлттық тасымалдаушы компания басшылығына жүктелетінін айтқан еді.

Сондай-ақ бұған дейін «Қазақстан темір жолының» қарызы 3 триллион теңгеден асқаны және алдағы уақытта билет бағасының өсуі мүмкін екені туралы ақпарат тараған болатын.