Мәжіліс депутаты Бақытжан Базарбек коммуналдық қызметтер тарифтерінің өсуіне енгізілген мораторийді ұзарту қажет екенін айтып, бұл мәселені кулуарда көтерді,-деп хабарлайды «Dalamedia» ақпараттық порталы.

Депутаттың айтуынша, елімізде коммуналдық қызметтер мен жанар-жағармай бағаларына қатысты мораторийдің күші бүгіннен бастап тоқтаған. Ол тарифтердің күрт өсіп кетпеуіне үміт білдіріп, тиісті органдар жақын арада нақты іс-қимыл жоспарын ұсынуы тиіс екенін атап өтті.

Базарбектің сөзінше, қазіргі тарифтер халықтың қалтасына ауырлық түсіріп отыр. Оның пікірінше, азаматтардың табысы мен шығыны арасында алшақтық бар, сондықтан баға саясатын қайта қарау қажет.

Депутат мораторийді ұзарту мәселесін күн тәртібінен түсірмеу керектігін айтып, тарифтерді көтеру жөніндегі бастамаларды кейінге шегере тұруды ұсынды.

Айта кетейік, бұған дейін елімізде коммуналдық қызметтер тарифтеріне мораторий 2026 жылдың бірінші тоқсанының соңына дейін енгізілген болатын. Осы кезеңде тарифтер уақытша тоқтатылып, монополистердің инвестициялық міндеттемелері тексерілді. Инфрақұрылымның тозу деңгейі 50 пайыздан асқаны да салада тариф саясатын қайта қарау қажеттігін туындатып отыр.

Мораторий аяқталғанымен, өтінімдерді қарау мерзіміне байланысты баға өзгерісі ең ерте маусым айында күтілуі мүмкін.