Энергетика министрі Ерлан Ақкенженов жанар-жағармай бағасының өсу мүмкіндігіне қатысты пікір білдірді.

Министрдің айтуынша, мораторий жарияланған кезде бағаның өсуіне тосқауыл қойылған. Нарықтық тетіктерді уақытша ерікті түрде тоқтату арқылы бұл әсер азайтылды.

«Егер 31 наурыздан кейін Үкімет жанар-жағармай құю стансаларының қызметіне араласпау туралы шешім қабылдаса және нарық өз жұмысын жалғастырса, онда ішкі сұраныс пен ұсыныс баға белгілеудің әрі қарай дамуына ықпал етеді», – деді Ерлан Ақкенженов.

Министр сондай-ақ Энергетика министрлігі 2025 жылдың 1 ақпанынан бастап жанар-жағармай нарығын реттемейтінін атап өтті.

«Біз бағаның күрт өсуіне жол бермейміз. Бұл экономикамыздың қазіргі жағдайына сәйкес жүзеге асырылады», – деді министр.

Еске сала кетейік, 2025 жылдың 16 қазанынан бастап АИ-92 маркалы бензин мен дизель отынының бағасын инфляция деңгейі тұрақтанғанға дейін көтеруге мораторий енгізілген болатын.