«Қазақстан темір жолы» ұлттық компаниясының басқарма төрағасы Талғат Алдыбергенов Wabtec локомотивтерін сатып алу құнына байланысты айтылған сын-пікірлерге түсініктеме берді, — деп хабарлайды «Dalamedia» ақпараттық порталы.

Еске салсақ, 2025 жылдың қыркүйегінде Нью-Йоркте Қазақстан мен Wabtec компаниясы арасында құны 4,2 миллиард доллар болатын келісім жасалған болатын. Брифинг барысында журналистер локомотивтердің бір данасы Қазақстан үшін 13–14 миллион долларға бағаланып отырғанын, ал Үндістанда осыған ұқсас техниканың арзанырақ сатып алынғанын алға тартты.

Бұл мәселеге жауап берген Талғат Алдыбергенов мұндай келісімдерді тікелей салыстыру дұрыс емес екенін айтты. Оның сөзінше, әр елдің сатып алатын техникасының түрі, техникалық сипаттамасы және келісімшарт талаптары әртүрлі болады.

ҚТЖ басшысы аталған келісім тек локомотивтерді сатып алуды ғана емес, оларды ұзақ мерзім бойы сервистік қызметпен қамтамасыз етуді де қамтитынын атап өтті. Сондай-ақ Wabtec компаниясы Қазақстанның жеті өңірінде 1500-ден астам адамды жұмыспен қамтып отырғанын жеткізді.

Оның айтуынша, тараптар арасында 2042 жылға дейін жарамды сервистік келісім бар. Бұл өз кезегінде шамамен 5 мың жұмыс орнын сақтауға және қамтамасыз етуге мүмкіндік береді.

Сонымен қатар Алдыбергенов компания бұған дейін блогерлерге Wabtec өндірісін көрсетіп, келісім бағасының қалай қалыптасатынын жан-жақты түсіндіргенін айтты.

«Үндістандағы және Қазақстандағы локомотивтердің техникалық мүмкіндіктері мен параметрлері әртүрлі. Сондықтан мұндай келісімдерді бір-бірімен салыстыруға келмейді», – деді ҚТЖ басшысы.

Айта кетейік, бұған дейін ұлттық тасымалдаушы Stadler компаниясының Швейцарияда өндірілген вагондарын пайдалануға енгізудің кешігуіне қатысты да түсініктеме берген болатын.