«Қазақстан темір жолы» ұлттық компаниясының басқарма төрағасы Талғат Алдыбергенов топ-менеджерлерге төленген сыйақыға қатысты пікір білдірді, — деп хабарлайды «Dalamedia» ақпараттық порталы.

Журналистер отырыс барысында ҚТЖ мен «ҚазМұнайГаз» компанияларындағы сыйақы көлемін салыстырып, ұлттық теміржол операторы қызметкерлеріне берілген бонус көлемі екі есеге жуық жоғары екенін атап өтті. Бұған қоса, компанияның қаржылық есебінде көрсетілген 1 миллиард теңгеден асатын сыйақы сомасы және 4 триллион теңгеден жоғары қарыз жүктемесі, сондай-ақ билеттер бағасының 7 пайызға қымбаттауы да еске салынды.

Талғат Алдыбергеновтің айтуынша, билет тарифтерінің көтерілуі инфляция деңгейіне байланысты жүзеге асқан.

Сонымен қатар ол сыйақы көлемін компания басшылығы емес, алты тәуелсіз мүшеден тұратын директорлар кеңесі бекітетінін және бұл шешімдер «Самұрық-Қазына» қорының корпоративтік тәртібіне сай қабылданатынын жеткізді.

«Бонустар таза пайдаға байланысты беріледі. 2025 жылдың қорытындысы бойынша ҚТЖ-ның табысы 2,1 есе артқан. 2024 жылы шамамен 185 миллиард теңге болса, 2025 жылдың соңына қарай 340 миллиард теңгеге жетті. Бұл төлемдер тек басқарма мүшелеріне емес, директорлар кеңесіне де қарастырылған. Оның ішінде жалақы, демалыс ақысы және өзге де төлемдер бар», – деді ол.

Оның айтуынша, сыйақы беру процесі бірнеше кезеңнен өтеді: алдымен ішкі аудит қызметі, кейін комплаенс қызметі, соңында директорлар кеңесі қарайды.

Айта кетейік, 1 миллиард теңгеден асатын сыйақы 19 адам арасында бөлінген.