Бразилияда 35 жастағы медбике өзі жұмыс істейтін перзентханадан жаңа туған сәбиді ұрлап, оны өз баласы ретінде көрсетпек болған. Осылайша ол жүкті екеніне сенген жігітін алдамақ болған, — деп хабарлайды «Dalamedia» ақпараттық порталы.

Оқиға 6 шілдеде болған. Ауриселия де Соуза Рошаның бұл күні жұмыс ауысымы болмаған. Соған қарамастан ол медициналық киімін киіп, перзентханаға келген. Кейін босанған әйелдің әпкесіне өзін медбике ретінде таныстырып, сәбиді тексеру үшін алып кететінін айтқан.

Роша нәрестені алып, палаталардың біріне кірген. Бірнеше минуттан кейін ол бөлмеден сәбисіз, бірақ иығына үлкен қара сөмке асынып шыққан.

Сәбидің әпкесі медбикенің әрекетінен күдіктеніп, соңынан ерген. Әйел киім ауыстыру үшін дәретханаға кірген кезде оның сөмкесін тексеріп, ішінен өзінің кішкентай жиенін тапқан. Сәби бірден анасына қайтарылды.

Тергеу кезінде Рошаның үйінен балаға арналған толық жабдықталған бөлме, бесік және жөргек ауыстыратын үстел табылған. Медбикенің жігіті оның жүкті екеніне сенгенін және екеуінің баланың дүниеге келуіне бірге дайындалғанын айтқан. Алайда тергеу барысында Рошаның шын мәнінде жүкті болмағаны анықталған.

Күдіктінің адвокаттары оның бойынан шизофрения белгілері байқалғанын мәлімдеген. Бірақ жүргізілген сараптама бұл болжамды растамаған.

Қазір Ауриселия де Соуза Роша қамауда отыр.