Мемлекет басшысы Қасым-Жомарт Тоқаев Бразилияның Сыртқы істер министрі Мауро Виейрамен кездесті, ,-деп хабарлайды «Dalamedia» ақпараттық порталы. Кездесу барысында тараптар екі ел арасындағы ынтымақтастықты одан әрі дамыту мәселелерін талқылады.

Президент Қазақстан үшін Бразилия Латын Америкасындағы маңызды серіктестердің бірі екенін атап өтті. Оның айтуынша, министрдің бұл сапары екіжақты байланысты жаңа деңгейге көтеруге мүмкіндік береді.

– Сіздің Қазақстанға сапарыңыз өте маңызды кезеңде өтіп отыр. Бұл кездесу елдеріміз арасындағы қарым-қатынасты нығайтып, жаңа бастамаларға жол ашады деп сенемін. Сізбен бірге іскерлік делегацияның келуі де Бразилияның ынтымақтастыққа айрықша мән беретінін көрсетеді, – деді Қасым-Жомарт Тоқаев.

Президент сондай-ақ Бразилия басшысы Луис Инасиу Лула да Силваға сәлем жолдап, оны Қазақстанға ресми сапармен келуге шақырды.

Өз кезегінде Мауро Виейра Қазақстанға Бразилия президентінің арнайы тапсырмасымен келгенін айтып, екі ел арасында саяси, экономикалық және мәдени байланыстарды кеңейтуге мүмкіндік мол екенін жеткізді.

Кездесу барысында энергетика, ауыл шаруашылығы, жасанды интеллект және тау-кен саласындағы бірлескен жобалар сөз болды. Сонымен қатар халықаралық қауіпсіздік, ядролық қарусыздану және БҰҰ жүйесін жаңғырту мәселелері талқыланды.

Тоқаев ядролық қаруды таратпау мен жаппай қырып-жоятын қарудың таралуына жол бермеу бағытында мемлекеттердің бірлесіп әрекет етуі аса маңызды екенін айтты. Сондай-ақ Қазақстан атом энергиясын тек бейбіт мақсатта әрі МАГАТЭ бақылауымен пайдалануға дайын екенін тағы да растады.

Президент Қазақстанның ядролық қауіпсіздік саласында халықаралық сенімге ие ел екенін айтып, елімізде ядролық материалдарды қауіпсіз пайдалануға қажетті инфрақұрылым мен ғылыми база қалыптасқанын атап өтті. Бұдан бөлек, МАГАТЭ-нің аз байытылған уран банкі де Қазақстан аумағында орналасқаны еске салынды.

Кездесу соңында Қасым-Жомарт Тоқаев Қазақстан Иранның ядролық мәселесін шешуге қолдау көрсетуге әзір екенін, алайда бұл үшін халықаралық келісім қажет екенін жеткізді.