Қазақстан Президенті Қасым-Жомарт Тоқаев Ресей Федерациясының Сыртқы істер министрі Сергей Лавровты қабылдап, екі ел арасындағы қарым-қатынастың стратегиялық серіктестік пен одақтастық рухында дамып келе жатқанын атап өтті, -деп хабарлайды «Dalamedia» ақпараттық порталы.

Кездесу барысында мемлекет басшысы бұған дейін жоғары деңгейде қол жеткізілген уағдаластықтардың орындалу барысына назар аударып, Қазақстан мен Ресей арасындағы сауда-экономикалық, инвестициялық және мәдени-гуманитарлық байланыстарды одан әрі нығайтудың маңызын айтты.

Сонымен қатар тараптар Ресей Президенті Владимир Путиннің мамыр айының соңында Қазақстанға жоспарланып отырған сапарына дайындық мәселесін де талқылады. Президент бұл сапарға Астананың ерекше мән беріп отырғанын жеткізді.

Қасым-Жомарт Тоқаевтың айтуынша, бұл сапар биылғы екіжақты күн тәртібіндегі негізгі оқиғалардың бірі болмақ. Ол сондай-ақ оның екі ел арасындағы одақтастық қатынастарды дамытуға айрықша серпін беретініне сенім білдірді.

Өз кезегінде Сергей Лавров Ресей Президентінің сапарына дайындық барысы жөнінде ақпарат беріп, екіжақты ынтымақтастықтың негізгі бағыттары үкіметтер мен сыртқы істер ведомстволары деңгейінде жан-жақты пысықталып жатқанын атап өтті.

Кездесу соңында Қасым-Жомарт Тоқаев пен Сергей Лавров халықаралық және өңірлік күн тәртібіндегі өзекті мәселелер бойынша пікір алмасты.