Астанада жаңа туған нәрестені заңсыз беру дерегіне қатысты сот үкімі шықты. 19 жастағы елорда тұрғыны сәбиді ақша үшін ерлі-зайыптыға бергені анықталып, ол ата-ана құқығынан айырылды, — деп хабарлайды «Dalamedia» ақпарат агенттігі.

Астана қаласының прокуратурасы бұл іс бойынша мемлекеттік айыптауды қолдаған. Тергеу барысында анықталғандай, жас ана делдалдар арқылы жаңа туған сәбиін ерлі-зайыпты жұпқа берген. Оқиға кезінде жүктіліктің сегізінші айында жалған суррогат ана болу туралы келісім жасалып, ақшалай сыйақы қарастырылған.

Соттың 2025 жылғы 23 мамырдағы үкімімен айыпталушылар Қазақстан Республикасы Қылмыстық кодексінің 135-бабы — «Кәмелетке толмағандар саудасы» бойынша кінәлі деп танылды. Сот оларға 8 жыл шартты жаза тағайындап, пробациялық бақылау белгіледі.

Баланың құқығын қорғау мақсатында сәби арнайы мекемеге орналастырылды. Сонымен қатар Астана қаласы әкімдігінің мамандандырылған балалар үйінің талап-арызы негізінде баланың анасы ата-ана құқығынан айырылған.

Прокуратура өкілдері мұндай заңсыз әрекеттер қатаң жауапкершілікке әкелетінін және бұл санаттағы істер тұрақты бақылауда болатынын ескертті.

Айта кетейік, бұған дейін де суррогат ана болуға қатысты даулы жағдайлар қоғам назарын аударған болатын.