Алматыда іші ауырып, дәрігерге қаралуға барған әйел күтпеген жағдайға тап болды, ,-деп хабарлайды «Dalamedia» ақпараттық порталы. Ол гастроэнтерологқа іштің кебуі мен ішек тұсының ауыратынын айтып шағымданған.

Науқас “Эмирмед” клиникасына тексерілу үшін жүгінген. УДЗ кезінде дәрігерлер оның шамамен жеті айлық жүкті екенін анықтаған. Әйелдің өзі бұл уақытқа дейін жүкті екенін білмеген.

Мамандар гинекологты шақырып, қосымша тексеріс жүргізген. Сол сәтте әйелдің босану процесі басталып кеткені белгілі болған.

Дәрігерлер шұғыл шешім қабылдап, босануды УДЗ кабинетінің өзінде қабылдаған.

Нәтижесінде дені сау қыз бала дүниеге келді. Анасы мен сәбидің жағдайы тұрақты деп бағалануда.

Кейін әйел мен жаңа туған нәресте жедел жәрдем қызметкерлеріне тапсырылып, перзентханаға жеткізілген.

Белгілі болғандай, отбасының бұған дейін баласы болмаған. Олар қыз балалы болуды көптен күткен екен.