Шымкентте Нұрай Серікбайдың өліміне қатысты сот отырысы жалғасып жатыр. Сотта марқұмды алып қашу дерегі бойынша сол кезде жауап алған бұрынғы тергеуші куәлік берді, — деп хабарлайды «Dalamedia» ақпараттық порталы.

Қаратау аудандық полиция бөлімінің бұрынғы тергеушісі Әбілғазы Артықбайдың айтуынша, ол 2025 жылдың 5 қазанында кезекшілікте болған. Сол күні шамамен сағат 21:00-21:30 аралығында қыз алып қашу туралы хабарлама түскен.

Тергеуші оқиға орнына барған кезде үйде адам көп болғанын, мерекелік көңіл күй байқалғанын айтты. Оның сөзінше, Нұрай отырған бөлмеге кіріп, қыздан мән-жайды сұраған.

«Нұрай Шерханмен үш ай қыз-жігіт болып сөйлескенін айтты. Алматыдан өз еркіммен келдім деді. Үйде адам көп болды», — деді Әбілғазы Артықбай сотта.

Алайда Нұрайдың ағалары оның Шерханмен қарым-қатынасы болмағанын бірнеше рет айтқанын жеткізген.

Тергеушінің айтуынша, кейін Нұрай мен Шерханды полиция бөліміне алып барған. Бірақ қыз тарапынан арыз түспеген соң, оларды жіберген.

Келесі күні прокуратурадан хабарласып, адам ұрлау фактісі бойынша сұрау салған. Прокуратураға Нұрайдың туыстары шағым түсіргені және екі тарапты қайта шақыру қажеттігі айтылған.

Тергеуші екі тарапты қайта шақырғанын айтты. Сол кезде Нұрай әкесімен бірге прокурорға кірген. Кейін қызбен жеке сөйлескен.

«Неге кеше өз еркіммен келдім дедің, қысым болды ма деп сұрадық. Ол ағаларының айтқанын жеткізді. Сол себепті қылмыстық құрам жоқ деп істі тоқтаттық», — деді ол.

Сотта анықталғандай, Нұрайдың ағалары шағым айтқанымен, тергеуші олардан жеке түсініктеме алмаған. Оның айтуынша, қыздың өзінен арыз болмағандықтан, мұндай қажеттілік жоқ деп санаған.

Сонымен қатар тергеуші болған жағдайды басшылыққа баяндамағанын айтты. Ол Нұрайдың қолхаты үйде жазылғанын, полиция бөлімінде қыздың шамамен 10-15 минут болғанын жеткізді.

Адвокат сотта Нұрайдың видеодағы сөздері алдын ала дайындалғандай көрінетінін айтып, оны кім жазып бергенін сұрады. Алайда тергеуші бұл туралы ештеңе білмейтінін айтты.

Әбілғазы Артықбай сол кездегі әрекетін заң талаптарына сай деп есептейтінін мәлімдеді.

Істің мән-жайы

Еске салайық, биыл қаңтарда Шымкентте 21 жастағы студент Нұрай Серікбай қаза тапқан еді. Полиция аталған факті бойынша адам өлтіру және аңду (сталкинг) баптары бойынша қылмыстық іс қозғаған.

Тергеу барысында күдіктінің бұған дейін Нұрайды мазалап, тіпті алып қашқаны анықталған. Кейін сот-психиатриялық сараптама нәтижесінде күдікті есі дұрыс деп танылып, заң алдында жауап беретіні хабарланды.

Бұған дейін марқұмның туыстары сот отырыстарын тікелей эфирде көрсетуді талап еткен. Алайда сотталушы тарап бұған қарсы болғандықтан, процесс онлайн көрсетілмейтін болды.

Айыптау тарапының мәліметінше, Шерхан Аймахан Нұрайды кездесуге шақырған, бірақ қыз бас тартқан. Кейін ол қыздың үйінің маңына келіп, оған шабуыл жасағаны айтылды. Прокурордың мәлімдеуінше, күдікті қылмысын кейін қайта оралып аяқтаған.

Қазір сот процесі жалғасып жатыр.