Шымкентте 21 жастағы Нұрай Серікбайдың өліміне қатысты қылмыстық іс бойынша алдын ала сот тыңдауы өтті. Сотта мемлекеттік айыптаушы Шерхан Аймаханға тағылған айыптарды жариялап, іс бойынша үш эпизодтың мән-жайын баяндады, — деп хабарлайды «Dalamedia» ақпараттық порталы.

Прокурордың айтуынша, алғашқы эпизод Нұрай Серікбайды ұрлау және некеге тұруға мәжбүрлеуге қатысты. Айыптау нұсқасына сәйкес, Шерхан Аймахан 2025 жылдың жазында танысқан қызбен кейін әлеуметтік желі арқылы сөйлесіп, оған отбасын құру туралы ұсыныс жасаған. Алайда Нұрай бұл ұсынысқа бірден келіспеген.

Тергеу мәліметінше, 2025 жылдың 4 қазанында Аймахан Алматыдағы Нұрай тұрған жалдамалы пәтерге барып, оны өзімен бірге алып кеткен. Кейін оны көлігімен Шымкентке жеткізген. Айыптау тарапының айтуынша, қыз жол бойында қарсылық білдіргенімен, сотталушы оны қорқытып, әрекетін жалғастырған.

Прокурордың мәлімдеуінше, Шымкентке келген соң Аймахан Нұрайды үйіне әкелген. Кейін оның туыстары қыздың басына ақ орамал жауып, жас жұбайлар бөлмесіне кіргізген. Айыптау тарапы бұл әрекеттерді Нұрайдың еркінен тыс некеге тұрғызу ниеті болғанын көрсететін жағдай ретінде бағалап отыр.

Сотта айтылған дерек бойынша, кейін Нұрайдың ағасы Сұлтан Серікбай және басқа туыстары Аймаханның үйіне барған. Нұрай ағасына өз еркімен келмегенін айтып, көмек сұраған. Осыдан кейін туыстары полиция шақырған.

Іс материалдарына сәйкес, полиция қызметкерлері екі тараптан түсініктеме алып, Нұрайды туыстарымен бірге үйіне жіберген.

Екінші эпизод Нұрай Серікбайды қудалауға қатысты. Айыптау тарапының мәліметінше, Аймахан оқиғадан кейін де қызбен байланыс орнатуға бірнеше рет әрекет жасаған. Ол оған ондаған рет қоңырау шалып, үйінің маңында күткен.

Прокурордың айтуынша, Аймахан кейін Нұрайдың жаңа телефон нөмірін біліп алып, тағы да хабарласуға тырысқан. Алайда қыз оның қоңырауларына жауап бермеген.

Үшінші эпизод Нұрай Серікбайдың өліміне қатысты. Айыптау актісіне сәйкес, 2026 жылдың 10 қаңтарында Шерхан Аймахан Шымкенттегі Нұрай тұрған үйдің ауласына келген. Прокурордың мәліметінше, оның жанында алдын ала дайындаған пышағы болған.

Айыптау нұсқасы бойынша, Нұрай көшеге шыққан кезде Аймахан оны бірге серуендеуге шақырған. Қыз бас тартқаннан кейін, сотталушы оған шабуыл жасаған. Прокурордың айтуынша, ол қызға бірнеше рет пышақ жарақатын салған. Оқиға орнынан кеткеннен кейін қайта келіп, әрекетін жалғастырған.

Нұрай Серікбайдың адвокаты мен жақындары сот процесін тікелей эфирде көрсетуді сұраған. Олардың айтуынша, бұл іс қоғам үшін маңызды, себебі мұндай жағдайлардың алдын алу және адамдарға құқықтық көмек жолдарын түсіндіру қажет.

Алайда сотталушы тарап сот отырысын онлайн көрсетуге қарсы болды. Екі жақтың келісімі болмағандықтан, судья процесті тікелей эфирде көрсетпеу туралы шешім қабылдаған.

Еске салайық, қаңтар айында Шымкентте 21 жастағы студент Нұрай Серікбай қаза тапқан еді. Тергеу барысында күдіктінің қызды бұған дейін де аңдығаны және алып қашу әрекеті болғаны айтылған. Қылмыстық іс адам өлтіру және сталкинг баптары бойынша тергелді.

Кейін күдіктіге сот-психиатриялық сараптама жүргізіліп, оның есі дұрыс деп танылғаны және заң алдында жауап беретіні хабарланды.