Атырау облысы Жангелдин ауылында әйелінің туыстарын өлтірді деп айыпталған Сұлтан Сәрсемәлиевтің ісі сотта қаралып жатыр. Тергеу мәліметіне сәйкес, ол төрт адамды өлтіргенін мойындаған, — деп хабарлайды «Dalamedia» ақпараттық порталы.

Сот отырысында мемлекеттік айыптаушы Мирас Бауыржанов айыптау актісін оқып, іске қатысты бірқатар жаңа деректерді жария етті. Прокурор қылмыстың мән-жайы мен күдіктінің кейінгі әрекеттерін де атап өтті.

Сәрсемәлиевке Қылмыстық кодекстің бірнеше бабы бойынша айып тағылып отыр. Атап айтқанда, екі немесе одан да көп адамды өлтіру, ұрлық, алаяқтық және құжаттарды заңсыз иемдену баптары қарастырылған.

Сотта айыпталушы өзіне қандай жаза қолданылса да, одан бас тартпайтынын мәлімдеді.

«Жасаған ісім үшін кез келген жазаны қабылдаймын. Өлім жазасына да, өмір бойына бас бостандығынан айыруға да дайынмын. Бұған отбасылық жағдайлар мен қайын жұртыммен арадағы түсініспеушілік себеп болды. Әйеліммен ұзақ жыл бірге тұрдық, балаларымыз бар. Алайда олардың араласуы біздің өмірімізге кері әсер етті», – деді ол.

Оның айтуынша, туыстар арасындағы кикілжің ұзақ уақытқа созылып, ақырында ауыр жағдайға алып келген.

Сот барысында Сәрсемәлиев істі алқабилердің қатысуынсыз қарауды сұрап, процесті кәсіби судья жүргізуін өтінді. Сонымен қатар ол тағылған айыптар мен сараптама қорытындыларын мойындайтынын жеткізді.

Прокурордың айтуынша, қылмыс жасалғаннан кейін күдікті із жасыру мақсатында аулада шамамен 1,3 метр тереңдікте шұңқыр қазып, мәйіттерді сонда жасырған.

Сотта оқылған деректерде жәбірленушілердің бірі қораға кірген сәтте оған пышақпен бірнеше рет соққы жасалғаны айтылды. Ауыр жарақат салдарынан ол сол жерде көз жұмған.

Кейінгі эпизодтарда басқа да жәбірленушілердің дәл осындай тәсілмен қаза тапқаны көрсетілген. Марқұмдардың жеке заттары мен қаражаты алынғаны да тергеу барысында анықталған.

Айыпталушы сотта қайын жұртының отбасылық өмірге араласуы өз әрекетіне түрткі болғанын тағы да қайталап, өзін тығырыққа тірелген адам ретінде сипаттады.

«Отбасымды сақтап қалуға тырыстым, бірақ жағдай ушығып кетті», – деді ол.

2025 жылдың желтоқсанында төрт адамның жоғалып кеткені туралы полицияға хабар түскен. Біраз уақыттан кейін олардың мәйіттері әртүрлі жерлерден табылған.

Кейін күдікті халықаралық іздеуге жарияланып, Индонезия аумағында ұсталған. Тергеу деректеріне сәйкес, ол елге жеткізіліп, уақытша ұстау изоляторына қамалған.