Шымкентте студент Нұрай Серікбайдың өліміне күдікті ер адам психикалық орталықтағы сараптамадан кейін қайтадан тергеу изоляторына ауыстырылды, — деп хабарлайды «Dalamedia» ақпараттық порталы.

Жәбірленуші тараптың адвокатының мәліметінше, Алматы облысында жүргізілген сот-психиатриялық сараптама нәтижесінде 28 жастағы күдікті ақыл-есі дұрыс деп танылған. Осыдан кейін мамыр айының басында ол қайтадан тергеу изоляторына жеткізілген.

Марқұмның адвокаты Омаров Нұрайдың отбасы тек негізгі айыпталушыға ғана емес, оның туыстарына қатысты да жауапкершілік мәселесін көтеріп отырғанын айтты.

– Біз күдіктінің туыстарын алдын ала сөз байласу арқылы некеге мәжбүрлеу дерегі бойынша жауапқа тартуды сұрап бірнеше мәрте өтініш бердік. Өтініштер қабылданды, қазір қаралып жатыр, – деді адвокат.

Қазір күдіктіге Қылмыстық кодекстің бірнеше бабы бойынша айып тағылған. Атап айтқанда, аса қатыгездікпен адам өлтіру, адам ұрлау арқылы некеге мәжбүрлеу және аңду деректері бойынша тергеу жүргізілуде.

Бұл іс қоғам назарын аударған резонанстық оқиғалардың біріне айналды. Тергеу амалдары әлі жалғасып жатыр.

Еске салсақ, биыл қаңтар айында Шымкентте 21 жастағы студент Нұрай Серікбай пышақ жарақатынан көз жұмған еді. Тергеу мәліметінше, күдікті бұған дейін де қыздың соңынан қалмай жүрген. Тіпті оны алып қашқаны туралы ақпарат тараған.

Кейін күдіктінің уақытша ұстау изоляторынан Талғардағы психикалық орталыққа ауыстырылғаны белгілі болып, марқұмның туыстары оның жауапкершіліктен жалтарып кетуі мүмкін екеніне алаңдаушылық білдірген.

Артынша Ішкі істер министрінің орынбасары Санжар Әділов сот-психиатриялық сараптама қорытындысына сәйкес айыпталушының есі дұрыс деп танылғанын және заң алдында жауап беретінін мәлімдеген болатын.