Шымкентте студент Нұрай Серікбайдың өліміне қатысты іс бойынша күдікті сот-психиатриялық сараптамадан өтіп, есі дұрыс деп танылды. Бұл туралы ҚР Ішкі істер министрінің орынбасары Санжар Әділов Сенат кулуарында мәлімдеді,-деп хабарлайды «Dalamedia» ақпараттық порталы.

Вице-министрдің айтуынша, қазір аталған іс бойынша тергеу амалдары соңғы кезеңге жеткен. Тергеуші қаулысы негізінде тағайындалған сот-психиатриялық сараптаманың қорытындысы дайын болған. Нәтижесінде күдіктінің өз әрекетіне жауап бере алатыны анықталған.

Сондай-ақ ол күдіктінің заң алдында жауапкершілікке тартылатынын атап өтті. Қазіргі уақытта қажетті тергеу жұмыстары жалғасып, қылмыстық іс аяқталуға жақын.

Еске сала кетейік, 21 жастағы Нұрай Серікбай биыл 11 қаңтарда танысының пышақ жарақатынан қаза тапқан. Оқиғадан кейін күдікті бой тасалағанымен, екі күннен соң Шымкент маңынан қолға түскен. Кейін марқұмның жақындары оқиғаға қатысты өз мәлімдемелерін жариялаған болатын.