Шымкент қаласында 21 жастағы қыз пышақ жарақатынан көз жұмды. Қайғылы оқиғаның болғанын қала полициясы ресми түрде растады.

Қолда бар деректерге сүйенсек, марқұмға қатысты қылмысқа оның бұрыннан таныс адамы күдікке ілініп отыр. Құқық қорғау органдары күдіктінің жеке басын анықтағанын хабарлады.

«Күдіктінің жеке тұлғасы белгілі болды. Алдын ала деректер бойынша, ол марқұммен таныс болған. Қазіргі таңда оны ұстау және қылмыстық жауапкершілікке тарту мақсатында жедел-іздестіру шаралары жүргізіліп жатыр», – делінген полиция таратқан ақпаратта.

Otyrar.kz порталы жариялаған бейнематериалдан тәртіп сақшыларының қолында бейнебақылау камераларынан алынған жазбалар бар екені байқалады. Сонымен қатар, қылмыс ашық көшеде жасалуы мүмкін деген болжам айтылуда.

Полиция өкілдері тұрғындарды расталмаған ақпарат таратудан бас тартып, тек ресми дереккөздерге сүйенуге шақырды. Тергеу амалдары жалғасып жатыр.