Атырауда бір отбасының қазасына қатысты қылмыстық іс бойынша сот процесі басталды, — деп хабарлайды «Dalamedia» ақпараттық порталы.

Сот отырысында прокурорлар айыптау актісін жариялап, айыпталушы Сұлтан Сәрсемәлиевке қатысты істің мән-жайын егжей-тегжейлі баяндады. Іс материалдарына сәйкес, бір отбасының мүшелері әртүрлі уақытта қаза тапқан.

Алдын ала деректер бойынша, Наурыз Мұқанғалиев Атырау маңындағы Геолог ауылында жалға алынған үйде қаза тапқан. Тергеу барысында оның денесі ұзақ уақыт бойы жер астында жатқан, қылмыстан шамамен 6–8 ай өткен соң табылғаны анықталған.

Прокурордың айтуынша, қылмыс жасағаннан кейін күдікті ізін жасыруға әрекет еткен. Ол қараңғы түскен сәтті күтіп, түн ішінде аулаға шығып, мәйітті жасырын түрде көмген.

«Түн ортасында ол күрек алып, ауласының оңтүстік бөлігін қазған. Мәйітті үй іргесінен небәрі 60 сантиметр жерге көмген. Қабірдің тереңдігі шамамен бір метр, ені 80 сантиметр болған», – деді прокурор сот отырысында.

Сонымен қатар, айыпталушы марқұмның жеке заттарын иемденгені айтылды. Оның ішінде жеке куәлік, банк картасы, ұялы телефон және қолма-қол ақша болған. Кейін ол қылмыс ізін жасыру мақсатында үй ішін мұқият тазалап, айғақ болуы мүмкін барлық заттарды жойған.

Сот-медициналық сараптама қорытындысына сәйкес, Наурыз Мұқанғалиевтің денесі жер астында 6–8 ай жатқан. Бұл жағдай өлімнің нақты себебін анықтауды айтарлықтай қиындатқан.

Прокурордың мәліметінше, күдікті қылмыстың ізін толық жою үшін үйді мұқият тазалап, қан іздерін кетірген. Сондай-ақ ас үй пышағын және мәйіт оралған кілемді қоқыс жәшігіне тастап, кейін өртеп жіберген.

Жауап алу кезінде Сұлтан Сәрсемәлиев өз кінәсін ішінара мойындаған. Ол Наурыз Мұқанғалиевке қатысты қасақана кісі өлтіру айыбын жоққа шығарып, оқиғаның абайсызда болғанын және өзін-өзі қорғау жағдайы болғанын айтқан.

Дегенмен ол өзге эпизодтар бойынша кінәсін толық мойындаған. Атап айтқанда, Мақсот Қарабалинді тоғыз рет, Насипа Өтешқалиеваны сегіз рет және Мейрамгүл Қарабалинаны 32 рет пышақтағанын растаған.

Сондай-ақ ұрлық, алаяқтық және құжаттарды заңсыз иемдену баптары бойынша да кінәсін мойындаған. Оның айтуынша, бұл әрекеттердің барлығы қылмыс ізін жасыру мақсатында жасалған.

Осылайша, оған тағылған 13 айыптың ішінде тек Наурыз Мұқанғалиевтің өліміне қатысты эпизод бойынша ғана кінәсін мойындамаған.

Еске салайық, бұл іс бойынша сот процесі 18 мамырда басталған болатын.

Оқиғаның мән-жайына сәйкес, 2025 жылдың желтоқсан айында полицияға Мақсот Қарабалин, Насипа Өтешқалиева және олардың екі баласының із-түзсіз жоғалғаны туралы хабар түскен. Туыстары олардың қараша айынан бері байланысқа шықпағанын айтқан.

Кейін жүргізілген іздестіру жұмыстары нәтижесінде олардың мәйіттері әртүрлі жерлерден табылған.

Күдікті ретінде 29 жастағы Сұлтан Сәрсемәлиев, қаза тапқандардың бұрынғы күйеу баласы халықаралық іздеуге жарияланған. Кейін ол Индонезия аумағында ұсталып, Қазақстанға жеткізілген.

Тергеу барысында оның көрсетпелері негізінде Атыраудағы үй ауласынан бұрын хабар-ошарсыз кеткен тағы екі адамның мәйіті табылған.