2029 жылдың сәуірінде Жерге диаметрі шамамен 350 метр болатын ірі астероид жақындайды. Мамандардың айтуынша, ол кезінде орманды жайпаған Тунгус метеоритінен бірнеше есе үлкен, ,-деп хабарлайды «Dalamedia» ақпараттық порталы.

Ғалымдар мұндай аспан денесі Жерге соққан жағдайда айтарлықтай зиян келтіруі мүмкін екенін айтады. Мәселен, Тунгус метеориті шамамен 2000 шаршы шақырым аумақта орманды жойып жіберген. Ал диаметрі небәрі 22 метр болған Челябинск метеориті атмосферада қуатты жарылыс тудырған еді.

Мамандардың сөзінше, Челябинск метеоритінің жарылысы бірнеше атом бомбасының қуатына тең болған. Ал Тунгус құбылысы шамамен 50 мегатоннаға бағаланады. Бұл — әлемдегі ең қуатты жарылыстардың бірімен пара-пар көрсеткіш.

Әңгіме 2003 жылы ашылған Апофис астероиді туралы болып отыр. Есептеулерге сәйкес, ол 2029 жылы Жерден шамамен 32–38 мың шақырым қашықтықта ұшып өтеді. Бұл арақашықтық ғарыштық өлшеммен алғанда тым жақын саналады.

Дегенмен, сарапшылар соқтығысу қаупі жоқ екенін нақтылайды. Астероид Жерге тимей, геостационарлық спутниктер орналасқан аймақ арқылы өтеді. Соған байланысты байланыс жүйелерінде белгілі бір қиындықтар туындауы мүмкін деген болжам бар.

Ғалымдардың айтуынша, Апофисті 2029 жылдың 13 сәуірінде қарапайым көзбен көруге мүмкіндік туады. Ол Айдан шамамен он есе жақын қашықтықта өтеді.

Қазіргі таңда Еуропалық ғарыш агенттігі астероидты зерттеу үшін арнайы ғарыш кемесін жіберуді жоспарлап отыр. Жобаға дайындық жұмыстары басталып кеткен.