Шымкентте студент Нұрай Серікбайдың өліміне қатысты өтіп жатқан сот отырысында айыпталушы Шерхан Аймаханнан жауап алынды. Іс барысында оның тергеу кезінде берген жауабы мен соттағы түсініктемесі бір-біріне қайшы келетіні белгілі болды, — деп хабарлайды «Dalamedia» ақпараттық порталы.

Судья Самиддин Темірәлиев сотталушының тергеу кезінде берген жауабын оқып берді. Онда Шерхан Аймахан 2026 жылғы 11 қаңтарда отбасы мүшелерімен бесік тойға барғанын, кейін Нұрай Серікбаймен Telegram арқылы байланысқа шыққанын айтқан. Қыздың қалаға келгенін білген соң алдымен туыстарын үйлеріне жеткізіп, кейін оның үйінің маңына барғанын көрсеткен.

Тергеу хаттамасына сәйкес, айыпталушы көлігінің бардачогынан қара түсті қапқа салынған пышақты алып, қалтасына салған. Біраздан кейін Нұрай сыртқа шыққанда оны Президент саябағына серуендеуге шақырған. Алайда қыз ештеңе айтпай үйіне қарай бет алған.

Хаттамада Шерхан Аймахан қыздың артынан барып, қалтасындағы пышақты алып бірнеше рет сұққанын айтқан. Кейін көлігіне отырып, Түркістан облысы Сайрам ауданындағы Қасымбек датқа ауылына кеткенін жеткізген. Сонымен қатар ауылға барған соң өзіне қол жұмсамақ болғанын, кейін көлігін қалдырып, сайға түсіп жасырынғанын да баяндаған.

Алайда сот отырысында айыпталушы оқиғаның көп бөлігін есіне түсіре алмайтынын, сол кезде аффект жағдайында болғанын мәлімдеді. Судья оның бұл сөзі тергеу кезінде берген егжей-тегжейлі жауабына қайшы келетінін атап өтті.

«Кеше "ештеңе есімде жоқ" дедіңіз. Ал тергеуде оқиғаны басынан аяғына дейін толық баяндағансыз. Қай жауабыңыз дұрыс?» деген судьяның сұрағына Шерхан Аймахан «оны тергеуші жазған» деп жауап берді.

Өз кезегінде судья тергеу барысында сотталушының адвокаты қатысқанын және хаттамаға қорғаушының қолы қойылғанын еске салып, жауаптың қысыммен алынғаны туралы уәждің негізділігіне күмән бар екенін айтты.

Еске салайық, 21 жастағы студент Нұрай Серікбай биыл қаңтар айында Шымкентте пышақ жарақатынан көз жұмған болатын. Қылмыстық іс адам өлтіру және сталкинг баптары бойынша қаралып жатыр. Бұған дейін сот-психиатриялық сараптама қорытындысына сәйкес, айыпталушы есі дұрыс деп танылып, заң алдында жауап беретіні хабарланған.