Шымкентте 21 жастағы студент Нұрай Серікбайдың өліміне қатысты сот процесі басталды. Сот отырысында 29 жастағы сотталушы Шерхан Аймахан жауап беріп, оқиғаға қатысты өз нұсқасын айтты, — деп хабарлайды «Dalamedia» ақпараттық порталы.

Сотталушының айтуынша, ол Нұраймен 2025 жылдың жазында танысқан. Аймахан қызға үнемі қаржылай көмектесіп, сыйлықтар жасағанын және қазан айында үйленуге шешім қабылдағандарын айтқан.

Оның сөзінше, 1 қаңтар күні кездескен кезде ол қарым-қатынасты тоқтататынын айтып, сақинаны қайтарып берген. Осыдан кейін жанжал шыққанын мәлімдеді.

«Айырылысып жатырмыз дегенімде, ол ашуланып, сақинаны лақтырып жіберді. Нұрай кеудемнен ұрып, балағат сөздер айтты. Қалтамда пышақтар бар екенін сездім. Кішісін алып шығып, оған бердім де, "ұрғаннан гөрі осыны тық" дедім. Нұрай пышақты алып, оң жақ бүйірімнен ұрды. Әрі қарай не болғаны есімде жоқ», — деді Шерхан Аймахан сотта.

Сотталушы сонымен қатар Нұрайдың туыстары олардың қарым-қатынасынан хабардар болғанын және кездесуге келісім бергенін айтты.

Еске сала кетейік, қайғылы жағдай қаңтар айында Шымкент қаласында болған. Тергеу мәліметі бойынша, 21 жастағы студентті жас жігіт пышақтап өлтірген. Нұрай Серікбай оқиға орнында көз жұмды. Кейін күдіктінің бұған дейін қызды аңдып жүргені және оны алып қашуға әрекет жасағаны анықталған.

Аталған факті бойынша полиция адам өлтіру және сталкинг баптарымен қылмыстық іс қозғаған.

Іс бойынша тергеу кезінде күдікті уақытша ұстау изоляторынан Талғардағы психикалық орталыққа ауыстырылғаны белгілі болған. Марқұмның туыстары оның жауапкершіліктен жалтаруы мүмкін екенін айтып, алаңдаушылық білдірген.

Кейін Ішкі істер министрінің орынбасары Санжар Әділов сот-психиатриялық сараптама қорытындысына сәйкес, айыпталушының есі дұрыс деп танылғанын және заң алдында жауап беретінін мәлімдеді.

Бұған дейін Нұрай Серікбайдың отбасы сот отырыстарын тікелей эфирде көрсетуді талап еткен болатын.