Банк басшысының сөзінше, оқиға 2025 жылдың сәуір-мамыр айларында болған. Тұрғын үй кезегінде тұрған азаматтың санаты заңсыз түрде өзгертіліп, оған көбірек жеңілдік беретін санатқа ауыстырылған. Атап айтқанда, ол мүгедектігі бар бала тәрбиелеп отырған отбасы ретінде көрсетілген.

Бұл жағдай жаңа ақпараттық жүйе іске қосылғанға дейін болған. Қазір банктің цифрлық жүйесінде әр қызметкердің қандай логинмен кіргені және қандай әрекет жасағаны туралы ақпарат сақталады.

Аталған іске қатысы бар екі қызметкердің еңбек шарты банктің бастамасымен бұзылған. Олардың бірі — өңірлік филиалдың қызметкері, екіншісі — орталық аппараттағы бизнес-аналитик. Банк олардың әрекетіне байланысты құқық қорғау органдарына арыз берген. Қылмыстық істер қозғалып, қазір полицияның өндірісінде.

Ләззат Ибрагимова заңсыз өзгеріс арқылы тұрғын үй алған азаматтың мәмілесі соңына дейін жеткізілмегенін атап өтті. Пәтер бойынша несие шартына қол қою кезінде заң бұзушылық анықталып, рәсім тоқтатылған. Кейін тұрғын үй қайтадан бөлуге шығарылып, кезек тәртібімен үлестірілген.

Осыған байланысты басқа азаматтардың тұрғын үй кезегіндегі орнына әсер болмаған. Банк басшысының айтуынша, ешкім материалдық шығынға ұшырамаған және өтемақы төлеу қажеттілігі туындамаған.

Бұған дейін «Отбасы банктің» 2025 жылғы есебінде қызметкерлердің заңсыз сыйақы алған бірнеше дерегі анықталғаны хабарланған болатын. Кейбір қызметкерлер клиенттер, риелторлар, нотариустар мен жеке сот орындаушыларының мүддесін алға жылжытуға және тұрғын үй кезегін өзгертуге көмектескені үшін ақша алған.

Сонымен қатар банк қызметкерлері ипотека рәсімдеу кезінде табыс туралы жалған құжаттарды пайдалану фактілерін де анықтаған. 2025 жылы алаяқтыққа қатысты сегіз жағдай тіркелген. Оның алтауы банк қызметкерлеріне, екеуі клиенттер мен үшінші тұлғалардың әрекеттеріне байланысты болған.