Қазақстанда ислам ипотекасын енгізу жұмыстары жүріп жатыр. Жоба 2026 жылдың қазан айында іске қосылуы ықтимал, — деп хабарлайды «Dalamedia» ақпараттық порталы.

«Отбасы банк» басқарма төрағасы Ләззат Ибрагимованың айтуынша, қазіргі уақытта жаңа өнім жан-жақты зерттеліп жатыр. Оның пікірінше, елімізде исламдық қаржыландыруға сұраныс жоғары.

Сонымен қатар, қаржы нарығын реттеу және дамыту агенттігі Парламентте ұлттық кредиттік-рейтингтік агенттік құру туралы заң жобасын бірінші оқылымда таныстырған. Құжат аясында «Отбасы банкке» исламдық қаржыландыру құралдарын ұсынуға мүмкіндік беретін нормалар қарастырылған.

Банк басшысы заң жобасы маусым айының соңына дейін қабылдануы мүмкін екенін, ал лицензиялау рәсімдері тамыз айына дейін жалғасатынын айтты. Осыған байланысты ислам қағидаттарына негізделген жаңа өнімді 2026 жылдың қыркүйегі мен қазан айы аралығында таныстыру жоспарланып отыр.

Ләззат Ибрагимова исламдық қаржы жүйесінде пайыз алуға тыйым салынатынын еске салды. Осыған байланысты банк пайызсыз депозит пен несие түрлерін ұсынуды көздеп отыр.