«Отбасы банкінде» бүгінде 3,5 миллионнан астам қазақстандықтың тұрғын үйге арналған 3 трлн теңгеден асатын жинағы сақтаулы. Банктің 2025 жылғы аудиттелген қаржылық есебіне сәйкес, өткен жылы қаржы ұйымы 126 млрд теңге көлемінде таза пайда тапқан. Бұл жоспарланған көрсеткіштен 5 пайызға жоғары, деп хабарлайды «Dalamedia» ақпараттық порталы.

Қаржы есебінде көрсетілгендей, банк табысының өсуіне тұрғын үйге қатысты мемлекеттік бағдарламалардың жүзеге асырылуы ықпал еткен. Сондай-ақ тұрғын үй құрылыс жинақ жүйесіне қызығушылықтың артуы салымшылар санының көбеюіне, депозит көлемінің ұлғаюына және халыққа берілетін несиенің артуына әсер еткен.

Банк құрылған уақыттан бері жалпы сомасы 21,7 трлн теңгеге 6,1 миллион шарт жасалған. Қазіргі таңда тұрғын үй құрылыс жинақ жүйесінде 3,5 миллионнан астам салымшы бар. Олардың жинағы 2,9 трлн теңгеге жеткен. Ал тұрғын үйге арналған жалпы жинақ көлемі бүгінде 3,2 трлн теңгені құрайды. Сонымен қатар ұзақ мерзімді халық салымдарының 37 пайызы осы банкке тиесілі болса, елдегі ипотекалық портфельдің 52 пайызы да «Отбасы банктің» үлесінде.

Банк кірісінің негізгі бөлігі берілген қарыздар бойынша есептелетін сыйақыдан түседі. Оның ішінде аралық заемдар ең көп табыс әкелетін өнім саналады. Былтыр берілген барлық қарыздың 64 пайызы осы бағытқа тиесілі болған. 2025 жылдың қорытындысында аралық тұрғын үй заемдарының көлемі алғаш рет 1 трлн теңгеден асты.

Өткен жылдың қорытындысы бойынша банк активтері 919,7 млрд теңгеге өсіп, 5,2 трлн теңгеге жеткен. Ал мерзімі 90 күннен асқан проблемалық несиелердің үлесі небәрі 0,12 пайызды құрап, бұл елдегі банк секторындағы ең төмен көрсеткіштердің бірі болды.

Банк міндеттемелері жыл соңында 24,2 пайызға артып, 4,4 трлн теңгені құрады. Оның 72 пайызы клиенттердің қаражаты есебінен қалыптасқан. Сондай-ақ «Отбасы банк» биыл күзде ислам ипотекасы бағдарламасын іске қосуды жоспарлап отыр.